«Atameken» palatasy dızel tapshylyǵy máselesin sheshýdiń jolyn usyndy
«Qazirgi tańda sharýalar dızeldiń qymbattaýyna alańdaýly. Tek olar emes, jalpy halyq pen bıznes te osy otyn túrine táýeldi ekeni belgili. Bul máseleni júıeli ári kezeń-kezeńimen sheshý kerek dep oılaımyz. Búginde elimizde tek 3 iri munaı óńdeý zaýyty bar. Sondaı-aq, birneshe shaǵyn kásiporyn jumys isteıdi. Biz únemi ishki naryqqa saraptama jasap otyramyz. Onyń nátıjesine baılanysty máseleni sheshý joldaryn usynamyz. Qazirgi tańdaǵy dızel tapshylyǵyn sheshý maqsatynda Qazaqstanda munaı óńdeýmen aınalysatyn bólek, iri zaýyt salý kerek dep esepteımiz», - dedi Raıymbek Batalov.
Sondaı-aq, kásipkerler palatasynyń ókilderi sharýalardyń suranysy negizinde elde agrobank ashý usynysy qarastyrylyp jatqanyn jetkizdi.
«Sharýalarǵa yńǵaıly bolýy úshin agrobank qurýdy usyndyq. Bul búgingideı bıýrokratııalyq júıe arqyly rásimdeletin nesıe bolmaıdy. Qazir kásibi úshin nesıe alatyn bıznes ıesi 35 qujat daıyndaýy qajet. Mundaı júıe bizge kerek emes. Al, agrobank qarajat qajet bolǵan fermerge barynsha jeńildetilgen tártipte qarjy usynatyn bolýy tıis. Bul bastamany Memleket basshyna da aıttyq», - dep usynysymen bólisti «Atameken» UKP Agroónerkásip kesheni komıtetiniń tóraǵasy Jıgýlı Daırabaev.
Onyń aıtýynsha, búginde mundaı bank kórshiles Reseıde bar. Aldaǵy ýaqytta bank qurý sheshimi qabyldansa, onda ony jasaqtaýda atalǵan eldiń tájirıbesin negizge alý josparlanǵan.
Aıta ketsek, keshe Úkimettiń keńeıtilgen otyrysynda Memleket basshysy Qasym-Jomart Toqaev sharýa qojalyqtary men iri saýda jelileriniń baılanysyn nyǵaıtýdy tapsyrdy.
Foto: danchoioto.vn
