«Atameken odaǵy» UEP «Qazaqstan - 2020» jalpyulttyq demokratııalyq kúshter koalıtsııasyna qosyldy
ANA. 13 qańtar. QazAqparat /Qanat Mámetqazyuly/ - «Atameken odaǵy» Ulttyq ekonomıkalyq palatasy «Qazaqstan-2020» jalpyulttyq demokratııalyq kúshter koalıtsııasyna qosylatynyn málimdedi.
Bul týraly búgin Astanada ótken baspasóz máslıhatynda «Atameken odaǵy» UEP basqarma tóraǵasy Azat Perýashev aıtty. Esterińizge sala keteıik, atalǵan koalıtsııa QR Tuńǵysh Prezıdenti-Elbasy N. Nazarbaevtyń ókilettigin uzartý týraly referendým ótkizýdi jaqtaıdy.
«Kún saıyn Almaty oblysynan, Almaty qalasynan, Qyzylorda, Pavlodar, Qostanaı, Atyraý, Mańǵystaý, Aqmola oblystarynan jáne basqa da qalalardaǵy kásipkerler tarapynan ujymdyq úndeýler kelip túsýde. Elimizdiń árbir óńirlerindegi mekemelerde, keńselerde azamattar referendým ıdeıasyn qyzý talqylap, ujymdardyń jıylystary ótip jatyr. Biz bundaı jaǵdaıda tek álgindeı bastamalardy bizdiń áriptesterimiz ózara baılanysta áreket etýi úshin ári jergilikti jerlerdegi referendýmdy uıymdastyrý jónindegi shtabtarmen birlese jumys isteýleri úshin úılestirip otyrýǵa ǵana úlgerip kelemiz», - dedi A. Perýashev.
Sonymen qatar, «Atameken odaǵynyń» basshysy bıznestiń orny saıasattan aýlaqta ekendigin aıta kele, bundaı dástúrdiń asa pragmatıkalyq qyrlaryna da úńildi. «Saıası kózqarastary úshin qoǵamdy jikke bólý naryqta belgili bir problemalardy týǵyzatyny aıqyn. Máselen, bázbir klıentterdiń bóligi qalaı daýys beretinińe qarap, sennen alystaýy múmkin. Alaıda, óz isińmen aınalysýyńa múmkindikti qarastyratyn bazalyq máselelerge kelgende, onyń ishinde óz elińde tynysh uıyqtap, bolashaqqa senimdilikpen qaraý máselesi qozǵalǵanda - bıznes árqashan asa múddeli tarap bolyp tabylady. Osy turǵydan alǵanda bıznestiń sózsiz saıasılanǵanyn, biraq sózsiz patrıot ekendigin aıtýǵa da bolady», - dedi A. Perýashev.
Onyń aıtýynsha, Elbasynyń qamqorlyǵynyń arqasynda táýelsizdik jyldary myńdaǵan el azamattary óz isimen aınalysýǵa múmkindik aldy, jurtshylyq turmys jaǵdaıyn túzep, erkin azamat bolýǵa jol ashyldy. «Jalpy referendým bıznes úshin kelesi onjyldyq boıy óziniń alańsyz áreket etýine kepil bola alady. Budan bólek, búgin qarapaıym azamattar Nazarbaevqa prezıdenttiktiń esh qajet emes ekendigin, al bizge, bizdiń azamattarǵa, memleketimizge Prezıdent Nazarbaevtyń asa kerek ekendigin biledi», dedi A. Perýashev.
