«Atameken» men «Samuryq-Qazyna» satyp alýlar salasynda ózara is-qımyl ornatýǵa kelisti (FOTO)
Búgin «Atameken» Ulttyq kásipkerler palatasy Prezıdıýmnyń tóraǵasy Tımýr Qulybaev pen «Samuryq-Qazyna» AQ Basqarma tóraǵasy Ómirzaq Shókeev otandyq kásipkerlerdi qoldaý men olardyń isin damytý týraly kelisimge qol qoıdy. Kelisimge saı, bul baǵyttaǵy jumys negizgi úsh baǵyt boıynsha, atap aıtsaq, otandyq taýar óndirýshilerdiń arasynda uzaq merzimdi kelisimsharttarǵa qol jetkizý; josparlanǵan jáne júzege asyrylatyn satyp alýlardyń ashyqtyǵyn qamtamasyz etý jáne taýar, jumystar men qyzmetterdiń baǵasyn, jergilikti úlestiń kólemine monıtorıng jasaý baǵyttarynda júzege asyrylady. «Meniń oıymsha, bıznes ashyqtyq, anyqtyq pen tıimdiligi qaǵıdattaryna saı qarjylandyrylýy kerek. Búgin qol qoıylǵan kelisimniń arqasynda «Samuryq-Qazyna» qorynyń satyp alýlar júıesi otandyq taýar óndirýshiler men taýar jetkizishýler úshin qoljetimdi bola túsedi. Al Ultyq kásipkerler palatasy óz kezeginde komıssııanyń quramyna qosyla otyryp, tenderlerdiń ashyqtyǵy men zańdylyǵyn barynsha baqylaýda ustaıdy», - dep málim etti T.Qulybaev. Óz kezeginde, Ó.Shókeev sońǵy jyldarda ózi basqaryp otyrǵan qor satyp alý júıesiniń ashyqtyǵyn qamtamasyz etý úshin qyrýar jumystar atqarǵanyn, qazaqstandyq úlesti arttyrýǵa erekshe nazar bólip kele jatqanyn atap ótti.
