«Atameken» memorgandardyń derekter bazasy kórsetilgen bıznes-reestr qurady
Onyń aıtýynsha, bızneske júrgiziletin turaqty baqylaý arqyly 621 másele anyqtalǵan jáne onyń 491-i nemese 79% sheshilgen.
«Máselen, «kóliktegi bızneske» kedergi joıyldy, turmystyq jáne kommýnaldyq-turmystyq tutynýshylarǵa gaz jetkizý úshin avanstyq tólemder alynyp tastaldy, turaqty avtomobıl tasymaly boıynsha kásipkerlik sýbektilerin 3 jylǵa QQS tóleýden bosatý týraly norma engizildi. Kelesi jyldyń aıaǵynda máselelerdiń kópshiligi sheshiledi dep úmittenemiz», - dedi R. Júrsinov QR Parlamenti Májilisinde ótken depýttarmen kezdesýde.
Onyń aıtýynsha, «Atameken» úshin bıznes ortany jaqsartýmen qatar tutynýshylar quqyǵynyń buzylmaýy da mańyzdy. Kásipkerlerdiń adaldyq dárejesin anyqtaý úshin kásipkerlik sýbektileriniń biryńǵaı bıznes-tizilimi qurylady. Qazirgi ýaqytta memlekettik organdardyń 100-den astam ártúrli derekter bazasy bar. Biryńǵaı bıznes-reestr osy barlyq málimetter bazasyn biriktiredi. Nátıjesinde ár kásipkerdiń tolyq «aqparattyq portreti» shyǵady. Parlamenttiń qoldaýymen Biryńǵaı bıznes-reestrdi 2020 jyldyń ekinshi jartysynda iske qosýǵa bolady.
Sonymen birge R. Júrsinov Qazaqstanda ózin-ózi retteý ınstıtýtynyń damı qoımaǵanyn atap ótti. Bıznes jaǵynan da, memlekettik organdar tarapynan da júıeli máseleler bar. Bıznes áli de jaýapkershilikti qabyldaýǵa daıyn emes, memlekettik organdar retteýshi ókilettikten bas tartqysy kelmeıdi. Parlamentpen birlesken «Jol kartasy» aıasynda bul máseleni zerttep, onyń sheshimin tabý josparlanyp otyr.
«Máselen, lıft sharýashylyǵy salasynda jaǵymdy mysal bar, bul pılottyq joba Nur-Sultanda júzege asyryldy. Munda ózin-ózi retteıtin uıym quryldy, naryqta jumys isteıtin sýbektilerdiń tizilimi jańartyldy jáne 2400 lıft tekserildi. Lıft jumysyna arnalǵan ulttyq standart ázirlendi. Joba júzege asyrylǵannan beri apattar sany azaıdy, sáıkesinshe shaǵymdar 40%-ǵa azaıdy. Bul oń tájirıbeni tutas elge taratý kerek», - dedi Rýstam Júrsinov.