«Atameken» kommertsııalyq jyljymaıtyn múlik ıelerinen shaǵyn bıznes ókilderin qoldaýdy ótindi
NUR-SULTAN. QazAqparat – Ulttyq kásipkerler palatasy kommertsııalyq nysandy nemese múlikti jalǵa berip otyrǵan kásipkerlerge ótinish bildirip, olardy shaǵyn bıznes ókilderin qoldaýǵa shaqyrdy, dep habarlaıdy QazAqparat tilshisi.
«Atameken» ulttyq kásipkerler palatasynyń kásipkerlerdi quqyqtyq qorǵaý departamentiniń dırektory Shyńǵys Temirdiń aıtýynsha eki aptadan beri palataǵa ártúrli másele boıynsha kásipkerlerden 11 myń ótinim kelip túsken. Eń jıi túsken suraqtardyń jaýabyn Atameken.kz saıtynan tabýǵa bolady. Kásipkerler dál osy saıtqa jáne 1432 qysqa nómirine habarlasyp, suraqtaryn qaldyra alady.
«Bıznes bizge qandaı másele boıynsha júginip otyr? Kásipkerlerdi mazalaıtyn mańyzdy máseleniń biri – jalǵa alynǵan nysan nemese múlik boıynsha tólem. ıAǵnı, jalǵa alýshy men jalǵa berýshiniń arasyndaǵy problema. Suraqtardyń 60 paıyzyna jýyǵy osy másele tóńireginde kelgen. Olardyń ishinde 86 paıyzy shaǵyn bıznes, 12 paıyzy orta jáne 2 paıyzy iri bıznes ókilderinen keldi. 62 paıyzy qyzmet kórsetý salasynyń ókilderi. ıAǵnı, engizilgen shekteýlerden zardap shekkenderdiń alǵashqy leginde osylar tur», - dedi Shyńǵys Temir Facebook paraqshasynda tikeleı efırden.
Departament dırektory qandaı jaǵdaıda kásipker «Atameken» palatasyna júgine alatynyn aıtyp ótti.
«Palata qazir jalǵa alýshy men jalǵa berýshi arasyndaǵy problemany medıatsııa arqyly sheshýge bolatyn alańdy qurdy. Ol qalaı jumys isteıdi? Jalǵa memlekettik nemese kvazımemlekettik sektordyń nysany, bolmasa kommertsııalyq múlik berilýi múmkin. ıAǵnı bıznes ókili kelesi bıznes ókilinen nysandy jalǵa alýy yqtımal. Memlekettik múlikti jalǵa alý máselesi tolyǵymen sheshildi dep aıtýǵa bolady. Onda másele joq. Memlekettik komıssııanyń otyrysynda Prezıdent ákimdikterge «20 naýryzdan bastap 3 aıǵa deıin ShOB sýbektileriniń memlekettik múlikti jalǵa alý boıynsha tólemnen bosatylýy kerektigin» tapsyrdy. Ol úshin memlekettik múlik portalyna (Gosreestr.kz) kirip, elektrondy tsıfrly qoltańba arqyly jalǵa alý kelisimine qosymsha kelisim jasaý kerek. Osy qujat arqyly siz jalǵa alý tóleminen 3 aıǵa bosatylasyz», - deıdi ol.
Al kommertsııalyq múlik boıynsha departament dırektory birshama másele baryn moıyndady.
«Bir jaǵynan jalǵa berýshiniń úshinshi tulǵanyń nemese kommnýaldyq qyzmettiń, bıýdjeti men jumyskerleriniń, banktiń aldyndaǵy óz mindettemesi bar. Ekinshiden kirisi joq kásipker jalǵa alyp otyrǵan orny úshin aqsha tóleýi tıis. Mundaı jaǵdaıda siz «Atameken» palatasynyń jergilikti fılıalyna júginýge nemese 1432 nómirine habarlasýǵa bolady. Biz qazir jalǵa berýshi men jalǵa alýshylardy bir alańǵa jınap, medıatsııalyq kelissózder arqyly problemany eńsergimiz keledi. Qazir memleket kásipkerlerge birshama jeńildik usyndy. Ol jeńildikterge jalǵa berýshiler de ilinýde. Ol qoldaý sharalarynyń ishinde salyqtyń keıbir túrinen bosatý, nesıeni keıinge shegerý, aılyǵy tómen otbasylarǵa tólem berý jáne kommýnaldyq tólemderdi shegerý tetikteri bar. ıAǵnı tıisti mehanızmniń bári bizde bar», - deıdi ol.
Shyńǵys Temir bul máseleni sheshýdi Prezıdent óńirdegi ákimderge de tapsyryp otyrǵanyn jetkizdi.
«Biz qazir jalǵa berýshilerge ótinish bildirgimiz keledi: búkil eldiń amandyǵy birlikke súıenip turǵan kezeńde shaǵyn bıznes teńdessiz soqqy alyp otyr. Mundaı jaǵdaıda jalǵa berýshi bızneske kómek kórsetýi kerek. Álbette nesıe men basqa da mindettemeler bar. Jalǵa berýshi óz shyǵynyn da jabý kerek. Áıtse de biz de olarǵa kómektesýge daıynbyz. Eger sizderdiń bankte problemańyz bolsa ony sheship berýge tyrysamyz. Salyqtan qıyndyǵyńyz bolsa ol salada sizge kómek qolyn sozatyn mamandarymyz bar. Eger sizder jumyskerlerińizdi aqysyz demalysqa jiberýge májbúr bolsańyzdar, bul rette de olarǵa mınımaldy aılyq berý máselesimen aınalysýǵa ázirmiz. Qandaı máselemen betpe-bet kelseńizder de sizder shaǵyn bızneske júktemeni azaıtamyn deseńizder, qoldaýǵa barynsha daıynbyz», - dedi ol.
