«Atameken» elorda jastaryna kásip ashýǵa qoldaý kórsetedi
«Biz elimizdegi paıda túsetin barlyq bıznes bastamaǵa qoldaý bildiremiz. Atap aıtqanda, «Bıznestiń jol kartasy -2020» baǵdarlamasy aıasynda ústimizdegi jyldyń 10 aıy boıynsha Astananyń 18 ben 29 jastaǵy 1200-den astam jastaryna óz isterin bastaýǵa qoldaý kórsettik. Onyń ishinde bıznes jospar qurý, zańdyq jáne býhgalterlik keńester berý, óz kásibin damytý jáne qorǵaı bilý, odan bólek, startap jobalarǵa qatysyp óz jobasyn usyný, saıt ashý jáne taǵy basqa. Sózime dálel, bizde bıznes bastaý baǵdarlamasy boıynsha oqyǵan jas kásipker búginde qala boıynsha sút satatyn qurylǵylar ornatyp, óz kásibin dóńgeletip jatyr. Sondyqtan ıdeıasy bar, maqsaty anyq jastarǵa esigimiz únemi ashyq, qodan kelgen barlyq qoldaýdy bildiremiz», - dedi Astana qalalyq «Atameken» UKP dırektory Alen Túlkibaev.
Sonymen qatar, kásipkerler palatasynyń basshysy aldaǵy ýaqytta qalanyń saýda úıleri men bazarlarynda saýdagerler men kásipkerlerge tegin keńes berý ortalyqtaryn ashý josparda bar ekenin aıtyp ótti.
Buǵan deıin habarlaǵanymyzdaı búgin Astanada qala jastarynyń forýmy ótip jatyr, onda belgili jetistikke jetken túrli sala mamandary óz tájirıbelerimen bólisip, jastardyń suraqtaryna jaýap berýde.
Aıta ketsek, Elbasy óziniń bıylǵy 5 qazandaǵy Joldaýynda 2010 jyly bastaý alǵan «Bıznestiń jol kartasy - 2020» baǵdarlamasynyń qoldanylý merzimin 2025 jylǵa deıin uzartý kerektigin aıtyp ótti. Baǵdarlamany júzege asyrý úshin jyl saıyn qosymsha keminde 30 mıllıard teńge bólýdi qarastyrý qajettigin jáne ol óz kezeginde 3 jyl ishinde qosymsha keminde 22 myń jańa jumys ornyn ashýǵa, 224 mıllıard teńge salyq túsirýge jáne 3 trıllıon teńgeniń ónimin óndirýge múmkindik beretinin atap ótken bolatyn.
Foto: qaz.infozakon.kz