«Atameken» bilim berý salasyndaǵy úzdik jobalardy anyqtaıdy
ASTANA. QazAqparat - Bıylǵy Tamyz konferentsııasy aıasynda "EduTech" atty bilim berý salasyndaǵy kásipkerlik jobalardyń baıqaýy ótedi. Baıqaýdyń uıymdastyrýshysy - "Atameken" ulttyq kásipkerler palatasy men "Bolashaq" túlekteriniń qaýymdastyǵy, dep xabarlaıdy QazAqparat tilshisi.
"Búginnen bastap baıqaýǵa qatysamyn deýshilerdiń ótinimderi qabyldanady. 11 tamyzǵa deıin biz jartylaı fınalǵa shyqqandardyń tizimin jarııalaımyz. 18 tamyz kúni Astanada jartylaı fınaldyq saıystar ótedi. Sol kezde kásipkerler óz jobalaryn tanystyrady. Al 22 tamyzda pedagogtardyń Tamyz konferentsııasynda fınal ótip, baıqaý jeńimpazdary anyqtalady", - deıdi kásipkerler palatasynyń adam kapıtalyn damytý departamentiniń dırektory Oljas Ordabaev.
Onyń aıtýynsha, konkýrsqa bilim berý salasyndaǵy ádistemelik quraldar, aqparattyq texnologııalar, san alýan sımýlıatorlar men trenajerlar, ınklıýzıvti bilim berý ádisterine arnalǵan jobalar qatysa alady. "Sosyn búginde aımaqtarda is júzinde qolǵa alynǵan jobalar bar. Biraq ondaı bastamalardy respýblıka aýmaǵynda kóp bile bermeıdi. Osy jobalardyń avtorlary da baıqaýǵa qatysa alady. Konkýrsqa qatysty barlyq aqparatty QR Bilim jáne ǵylym mınıstrligi, "Atameken" palatasy men "Bolashaq" túlekteri qaýymdastyǵynyń resmı saıttarynan tabýǵa bolady", - dep atap kórsetti palata ókili.
