«Atameken» basshysy qazaqstandyq kompanııalarǵa sanktsııa qaýpi bar ekenin moıyndady

«Atameken» ulttyq kásipkerler palatasynyń tóralqa tóraǵasy Raıymbek Batalov qazaqstandyq kompanııalardyń sanktsııaǵa túsý qaýpi týraly pikir bildirdi, dep habarlaıdy Kazinform. 

«Qazaqstanda jumys istep jatqan kompanııalardyń basym bóligi tehnologııa transfertteý jáne eksporttaý baǵytynda jumys isteýge daıyn dep esepteımiz. Bul jerde baqylaý júıesiniń aıqyn bolǵany mańyzdy. Ókinishke qaraı, keıbir mysaldar bar. Aǵash untaǵynan jelimdeletin taqtaı túrlerine baılanysty, basqa da óndirispen baılanysty mysaldar. Solar sanktsııa talaptaryn buzsa kerek. Biraq bul máseleniń úsh jaǵy bar. Onyń ishine memleket tarapynan jasalatyn baqylaý da jatady. Sanktsııa talaptaryn buzǵany týraly qorytyndy jasaýǵa negiz bolatyn erejeler de mańyzdy. Sondyqtan bizge baqylaý jumysyn qatańdatý, bıznes pen óndiristiń úlken bóligin osynda shoǵyrlandyrý boıynsha jumys isteý kerek. Sonda bizge qarsy eshqandaı ýáj aıtylmas edi. Árıne, ımport operatsııalary bar. Qytaıdan alyp, kórshi elderge, sonyń ishinde Reseı Federatsııasyna da eksporttalýy múmkin. Biraq bul jerde máseleniń eki ushy bar. Baqylaý jáne bıznespen jumys», - dedi Raıymbek Batalov «Qazaqstandyq quram 2.0» halyqaralyq forýmynda BAQ ókilderine bergen suhbatynda.

«Atameken» basshysy otandyq bıznes sanktsııa túspeý úshin túrli formattaǵy kezdesýler ótkizip, túsindirý jumystary júrgizilip jatqanyn atap ótti. Onyń paıymynsha, keıbir kompanııalar aqparattyń joqtyǵynan da sanktsııa qaterine ushyraýy múmkin.

«Sanktsııaǵa kóbine qyrǵyz kompanııalary tap boldy. Bizdikiler de bar, biraq az. Sanktsııa qaýpi bar, ony joqqa shyǵarmaımyz, ondaı bolady. Ulttyq palata bir jaǵynan, Úkimet ekinshi jaǵynan osy baǵytta jumys istep jatyrmyz. Ondaı qaterdi joıýymyz kerek. Bul turǵyda elshiliktermen de belsendi jumys istep jatyrmyz», - dedi ulttyq palata basshysy.