«Atameken» Arystaǵy jarylystan zardap shekkenderge qarjy jınap jatyr

NUR-SULTAN. QazAqparat - «Atameken» ulttyq kásipkerler palatasy bıznes-qaýymdastyq ókilderin Arys qalasyndaǵy jarylystardan zardap shekken turǵyndarǵa qoldan kelgenshe kómek kórsetýge shaqyrdy, dep habarlaıdy QazAqparat «Atameken» UKP-nyń baspasóz qyzmetine silteme jasap.

«Qazirgi tańda Túrkistan oblysy men Shymkenttiń kásipkerleri kómek kórsetip jatyr. Atap aıtqanda osy kezde medıtsınalyq jáne psıhologııalyq kómekti jeke klınıkalar kórsetýde. Turǵyndarǵa ýaqytsha turaqtaıtyn oryn taýyp berip, olardy azyq-túlikpen qamtamasyz etý jumystary da uıymdastyrylýda. Túrkistan ýnıversıteti janynan 300 adamǵa arnalǵan oryn daıyndaldy»,-delingen habarlamada.

Óz kezeginde óńirlik kásipkerler palatasynyń qyzmetkerleri de evakýatsııa kezinde joǵalyp ketken balalardy izdestirý jumystaryna atsalysýda.

«Kásipkerlerdi tek qarjylaı ǵana emes, múmkindiginshe gýmanıtarlyq kómek te kórsetýge shaqyramyz. Gýmanıtarlyq kómek boıynsha, Túrkistan oblysy (Qonaeva 83/1) mekenjaıy jáne Shymkenttiń (Qojanov kóshesi, «Atameken-2») óńirlik kásipkerler palatasyna habarlasýǵa bolady»,-dep habarlady UKP.

Qarjy jınaıtyn esepti «Meniń Atamekenim» qoǵamdyq birlestigi ashty. Qarjyny kompıýter nemese smartfonnan siltemege ótý («kómek kórsetkim keledi degen belgini basyp) arqyly aýdarýǵa bolady.

Sondaı-aq myna bank rekvızıtterin paıdalanýǵa bolady: 010000, Nur-Sultan qalasy, Esil aýdany, Syǵanaq kóshesi, 25-shi úı BIN 180540015308 IIK KZ759470398991370112 BIK ALFAKZKA «Alfa-Bank».

Aıta keteıik, osyǵan deıin Túrkistan oblysynyń Arys qalasyndaǵy áskerı bólimniń qoımasynda jarylys bolǵandyǵyn habarlaǵanbyz.

Oqıǵa ornyna shuǵyl túrde Memleket basshysy Qasym-Jomart Toqaev jetip, jarylys aýmaǵynan evakýatsııalanǵan turǵyndarmen kezdesti.