«Atameken» áni Beıjińdegi qazaqtardyń júregin eljiretti

Respýblıka kúnine oraı uıymdastyrylǵan is-shara Qyzylorda oblysy ákimdiginiń qoldaýymen ótti. Kontsert Qazaqstan men Qytaı arasyndaǵy gýmanıtarlyq yntymaqtastyqty nyǵaıtýǵa jáne ulttyq ónerdi halyqaralyq deńgeıde dáripteýge arnaldy.

Kontsertte óńirdiń tanymal óner maıtalmandary óner kórsetti. Sahnaǵa Qyzylorda oblystyq fılarmonııasynyń folklorlyq ansambli, «Tomırıs» bı ujymy, «Altyn dombyra» baıqaýynyń úsh dúrkin jeńimpazy, aqyn-ımprovızator Muhtar Nııazov, «Qurmet» ordeniniń ıegerleri Sholpan Bımbetova, Aqmaral Nogaıbaeva, Samal Báıseıitova men Indıra Elýbaeva shyqty.

Sondaı-aq «Eren eńbegi úshin» medaliniń ıegerleri Rýslan Ahmetov pen Symbat Tasbergenova, «Mádenıet salasynyń úzdigi» tósbelgisiniń ıegerleri Raýza Ysqaqova, Gúlfıra Álıhanova men Maqsat Maqulbekov, halyqaralyq jáne respýblıkalyq baıqaýlardyń laýreattary Maǵjan Amanjolov, Bekzat Moldabergenov pen Araılym Mahanbetjanova óner kórsetti.

Kesh barysynda ónerpazdar kórermenderge qazaqtyń dástúrli kúılerin, halyq ánderin jáne horeografııalyq ónerdiń jarqyn úlgilerin usyndy. Olar Qazaqstannyń baı rýhanı murasy men oryndaýshylyq óneriniń joǵary deńgeıin tanytty.

Mazmundy kontserttik baǵdarlamanyń qoıýshy rejısseri — mádenıet salasynyń úzdigi Ázıza Іzdiqulova. Ol ulttyq dástúrler men zamanaýı sahna múmkindikterin birtutas qoıylymǵa biriktirdi.

Qazaqstandyq ónerpazdardyń ónerin kórermender dý qol shapalaqpen qarsy aldy. Kontsert sońynda olar baǵdarlamanyń joǵary deńgeıine tánti bolǵanyn jasyrmady.

— Biz Shyńjańnan balamyzdy emdetý úshin Beıjińge keldik. Osy múmkindikti paıdalanyp, Beıjińdegi Qazaqstannyń mádenı ortalyǵyna da barýdy uıǵardyq. Qyzylordalyq ónerpazdardyń kontsertine tap bolǵanymyzǵa óte qýanyshtymyz. Olardyń ónerine tánti boldyq! Osyndaı mádenı almasý keńeıip, qazaqstandyq ujymdar bizge jıi kelse eken deımiz. Kontsert óte joǵary deńgeıde uıymdastyrylǵan, — dedi QHR Shyńjań-Uıǵyr avtonomııalyq aýdanynyń Altaı qalasynan kelgen muǵalim Maıra Baqasqyzy.

Jergilikti qazaq dıasporasynyń ókili Aısholpan da kontsertten erekshe áser alǵanyn aıtty.

— Kóńilim erekshe jylyp qaldy. Beıjińde júrip, ulttyq ánderimiz ben bılerimizdi tamashalaý múmkindigine ıe bolǵanyma óte qýanyshtymyn. Ásirese, kontserttiń sońynda oryndalǵan «Atameken» áni júregimdi erekshe tebirentti, — dedi ol.

Merekelik keshke sheteldikter arasynda qazaq tilin bilý deńgeıi boıynsha ótken III halyqaralyq baıqaýǵa qatysqan Lıý Sıaolan da keldi. Ol qazaq tilin 62 jasynda óz betinshe úırene bastaǵan.

— Búgingi kontsert maǵan erekshe áser qaldyrdy. Bul ulttyq dástúrlerdiń baılyǵyn aıqyn tanytqan, kásibı deńgeıi joǵary ujymnyń naǵyz saltanatty kontserti boldy. Kútkenimnen de asyp tústi. Maǵan bári unady: dástúrli kıimderdiń ásemdigi men alýan túrliligi, mýzykalyq aspaptar jáne, árıne, oryndaýshylyq sheberlik. Ásirese, vokaldyq ónerdi atap ótkim keledi. Menińshe, bul — sizderdiń eń myqty qyrlaryńyzdyń biri, oǵan árdaıym tántimin. Búgin osynyń bárin jandy daýysta tyńdap, erekshe lázzat aldym. Kóp raqmet! — dedi Lıý Sıaolan.

Kontsert 2026 jyl Qazaqstan men Qytaıdyń Mádenıet jyly dep jarııalanýyna oraı uıymdastyrylǵan mańyzdy alǵashqy is-sharalardyń biri boldy. Keshke Qytaı astanasynyń turǵyndary men qonaqtary, sondaı-aq eki eldiń mádenıet jáne óner qaıratkerleri qatysty.

Eske salaıyq, buǵan deıin alysta júrse de, atamekendi umytpaǵan qazaqtar Vashıngtonda bas qosqanyn jazǵanbyz.