Atambaevty ustaý: Shý oblystyq aýrýhanasyna oq tıgen 2 er adam tústi
BІShKEK. Kabar-QazAqparat – Shý oblystyq aýrýhanasyna saǵat 21.20-da jedel járdem keýdesine rezeńke oq tıgen 2 er adamdy jetkizildi. Bul týraly QazAqparat Kabar agenttigine silteme jasap habarlaıdy.
Qyrǵyz respýblıkasy Densaýlyq saqtaý mınıstrliginiń deregine qaraǵanda, zardap shekkenderdiń jaǵdaıy ortasha aýyr. Qazir olarǵa medıtsınalyq kómek kórsetilip jatyr.
Shý oblysyndaǵy jedel járdem stansasyna saǵat 20.20-da habar kelip túsken. Oqıǵa ornyna Shý oblysynan 5 jedel járdem jasaǵy, Bishkekten 3 jasaq jetken.
Buǵan deıin habarlaǵanymyzdaı, Qoı-Tashta Almazbek Atambaevty ustaý operatsııasy júrip jatyr.
Eske salaıyq, buǵan deıin Jogorký Kenesh eldiń eks-prezıdenti Almazbek Atambaevtan tıispeýshilik mártebesin alyp tastaý týraly sheshim qabyldaǵan edi.
Aıta ketý kerek, buǵan deıin Atambaevqa qatysty depýtattar tarapynan taǵylǵan aıyptardy zertteý boıynsha arnaıy depýtattyq komıssııa qurylǵan bolatyn. Komıssııa jumysynyń nátıjesinde eks-prezıdentke 6 bólim boıynsha aıyp taǵý týraly sheshim qabyldandy.
Alaıda Bas prokýratýra komıssııanyń jumysyn zań turǵysynan baǵalaı kele, tek bes bólimdi qaldyrdy.
Osylaısha, Atambaev Qoı-Tash aýylynan jer telimin zańsyz satyp alyp, úı salý, qylmys álemine tanymal Azız Batýkaevty qamaýdan bosatýǵa zańsyz buıryq shyǵarý, «Forým» ǵımaratyn Sýbıhı Parhatıge jalǵan satý, Bishkek qalasynyń Jylý elektr ortalyǵyn qaıta qurý jáne ol úshin kómir satyp alý kezindegi jemqorlyq áreketter boıynsha kúdikke ilinip otyr.
Atambaev osymen úshinshi ret ІІM-ge uıymdasqan qylmystyq toptyń jetekshisi A.Batýkaevty bosatý isi boıynsha jaýap alýǵa shaqyrtylǵan. Alaıda ol barmaǵan.
