Atambaev elde tóńkeris jasamaq boldy – Qyrǵyzstan MUQK basshysy
BІShKEK. QazAqparat-Kabar – Qyrǵyzstannyń burynǵy prezıdenti Almazbek Atambaev tóńkeris jasamaqshy bolǵan. Bul týraly Qyrǵyzstannyń memlekettik ulttyq qaýipsizdik komıtetiniń tóraǵasy Orozbek Opýmbaev baspasóz máslıhatynda málim etti, dep habarlaıdy QazAqparat Kabar agenttigine silteme jasap.
Ol Almazbek Atambaevtyń adamdarǵa 1-3 myń som aralyǵynda aqsha tólep, úıiniń aldyna ádeıi jınaǵanyn atap ótti.
Qyrǵyz Respýblıkasynyń MUQK basshysy operatsııaǵa «Alfa» arnaıy jasaqtyń jiberilgenin túsindirdi.
Onyń aıtýynsha, ereje boıynsha «Alfa» antıterrorıstik áreketterde tartylady. Biraq, ol qosymshaǵa sáıkes, keıbir jaǵdaıda arnaıy jasaqtyń jumyldyrylatynyn atap ótti. MUQK basshysy «Alfa» arnaıy jasaǵynyń esirtki tasýshylar men uıymdasqan qylmystyq topty ustaý kezindegi operatsııasyn mysal retinde keltirdi.
«Arnaıy jasaq jedel ýákilderdi zorlyq áreketterden qorǵaýy kerek edi. Sondyqtan, olardyń sany az boldy. Májbúrlep alyp kelýdiń bes nusqasy qarastyryldy. Oryn alǵan jaǵdaı – bir nusqa edi jáne ol eń tıimdisi bolatyn. Sebebi, kez kelgen áreket – arnaıy jasaq, ІІM jáne MUQK jumysy týraly aqparat Atambaevtyń shtabyna jasyryn jetkizildi. Segizbaevtyń (Abdıl Segizbaev, burynǵy MUQK basshysy) jáne Israılovtyń (Ýlan Israılov, burynǵy ishki ister mınıstri) organdaǵy burynǵy jáne qazirgi adamdar osy úshin aqsha alyp otyrdy. Barlyǵyn shtabqa jetkizip otyrdy, sondyqtan kenetten shabýyldaý týraly sheshim qabyldandy. Atambaev 500 adam jınady. Olar balalar, áıelder jáne qarııalar edi. Oǵan bılikti aıyptaý úshin qan tógý kerek boldy, ol memlekettik tóńkeris jasaıtyn edi», - dedi ol.
Opýmbaev atap ótkendeı, Atambaev esikteri men terezelerine temir qorshaý ornatyp, úıin qorǵaýǵa tolyqtaı daıyndalǵan.
«Atambaevtyń úıinen Dragýnov snaıperlik vıntovkasy, árqaısysynyń ishinde 480 patrony bar 2 temir jáshik tabylǵan. Budan bólek, 4-5 vıntovka, tapansha men taǵy basqa qarý-jaraqtar boldy», - dedi ol.
7 tamyz kúni keshke Qoı-Tashta eldiń burynǵy prezıdenti Almazbek Atambaevtyń úıinde A.Batýkaevtyń isi boıynsha tergeý organdaryna kúshtep ákelý kezinde qaýipsizdik kúshteri ókilderi men burynǵy prezıdentti qoldaýshylar arasynda qaqtyǵys boldy.
Sonyń saldarynan «Alfa» MUQK arnaıy bólimshesi basshysynyń orynbasary Úsen Nııazbekov kóz jumyp, 40-tan astam adam jaralandy.
8 tamyz kúni quqyq qorgaý organdary Atambaevty Qoı-Tash aýylyndaǵy úıinde qolǵa túsirip, 26 tamyzǵa deıin UQK Tergeý ızolıatoryna jiberildi.
Qoı-Tashta oryn alǵan jaǵdaıǵa, arnaı jasaq qyzmetkeriniń kóz jumýyna jáne quqyq qorǵaý organdary qyzmetkerleriniń jaraqattanýyna baılanysty sotqa deıingi is júrgizý bastaldy.
