Atambaev Bishkektegi áýe apatynan kóz jumǵandarǵa arnap duǵa oqydy
BІShKEK. QazAqparat - Qyrǵyzstan prezıdenti Almazbek Atambaev Bishkek túbinde «Boıng-747» júk ushaǵy qulaǵan apatta mert bolǵandardyń týystarymen kezdesti, dep habarlaıdy «QazAqparat» HAA Bishkektegi menshikti tilshisi Qyrǵyz prezıdentiniń baspasóz qyzmetine silteme jasap.
Kezdesý áýe apatynan kóz jumǵandardy bir mınýt únsizdikte eske alýmen bastaldy, Prezıdent qaıǵyly apat qurbandarynyń týystaryna kóńil aıtty.
«Bul barlyq qyrǵyzstandyqtar úshin orny tolmas qaza - bútin otbasy, kishkentaı balalar baqılyq boldy. Adamdardyń ajal qushýy - úlken qaıǵy. Bul apat bizdiń júregimizge aýyr tıdi. Taǵy da qaıǵylaryńyzǵa ortaqtasyp, kóńil aıtamyn. Bekem bolyńyzdar. Sizder jalǵyz emessizder. Árbir qyrǵyzstandyq bolǵan jaıtty aýyr qabyldady jáne qatty qaıǵyrdy», - dedi A.Atambaev.
Ol zardap shekkenderge memleket barlyq qajetti sharany jasaıtynyn atap ótti. «Zardap shekkenderi baspanamen qamtamasyz etý - basty mindetterdiń biri. Atalǵan másele apattyń alǵashqy sátterinen-aq meniń jeke qadaǵalaýymda», - dep atap ótti prezıdent.
Sonymen birge, ózge de máseleler kóterildi.
Óz kezeginde, qaza tapqandardyń týystary el prezıdentine, úkimetke jáne barsha Qyrǵyzstan halqyna kórsetilgen qoldaý úshin alǵys bildirdi.
Prezıdent kezdesý sońynda marqumdarǵa baǵyshtap duǵa oqydy.
