Atambaev bılikti beıbit jolmen berýge kepildik berdi
ASTANA. QazAqparat - Qyrǵyzstan prezıdenti Almazbek Atambaev bılikti beıbit jolmen berýge kepildik berdi. Bul týraly ol dúısenbi kúni Sholpan Ata qalasynda ótken baspasóz máslıhatynda aıtty, dep habarlaıdy «Kabar» QUAA.
«Prezıdent saılaýynyń nátıjesi qandaı bolsa da, ony moıyndaý kerek. Bastysy - biz daýystardy ádil túrde esepteýge kepildik beremiz. Adamdar óz daýystaryn satyp jatsa, basqa áńgime. Bul óte qıyn. Keıbir azamattarymyz óz jaýapkershilikterin tolyq túsinbeıdi», - dedi Atambaev.
Memleket basshysy bılikti beıbit jolmen berýge kepildik beretindigin málimdedi. «Al jaǵdaıdy ýshyqtyrǵysy keletindermen basqasha sóılesetin bolamyz», - dep atap ótti prezıdent.
Aıta keteıik, Atambaevtyń Qyrǵyzstan prezıdenti retindegi ókilettiligi 2017 jylǵy 1 jeltoqsanda aıaqtalady. Qyrǵyzstan Respýblıkasynyń jańa prezıdentiniń saılaýy 15 qazan kúni ótedi.
