Ataqty jıhankez Maǵjan Saǵymbaev Qazaqstandy atpen aralap shyqpaq nıette
ALMATY. QazAqparat - Almaty Marafony tek almatylyqtar úshin ǵana emes, búkil qazaqstandyqtar úshin de aıtýly sporttyq mereke. Ol adamdar arasynda dostyqtyń, tanystyqtyń nyǵaıýyna septigin tıgizedi. Búgin Almaty Marafonyna tuńǵysh ret qatysqan belgili jıhankez Maǵjan Saǵymbaev «QazAqparat» tilshisine bergen suhbatynda osylaı dedi.
«Men búgin Almaty Marafonyna tuńǵysh ret qatysyp, 42 shaqyrym 195 metr qashyqtyqty júgirip óttim. Eń qıyn kezeń 30-35 shaqyrymnan keıin bastalady eken. Ári qaraı, ózińdi qamshylap, jigerińdi janyp júgirmeseń bolmaıdy. Mine, osyndaı synaqtar adam boıynda shydamdylyq, tózimdilik qasıetterdi qalyptastyrady», - dedi M. Saǵymbaev.
Sonymen qatar, Maǵjan bolashaqta Qazaqstan aýmaǵyn atpen aralap shyǵýdy armandaıtyndyǵyn jetkizdi.
«Men kezinde dúnıejúzin velosıpedpen aralap shyǵyp edim. Taıaýda Maqsut Jumaev ekeýmiz Ońtústik Amerıkanyń eń bıik shyńy - Akonkagýa shyńyn baǵyndyrdyq. Endi aldaǵy ýaqytta Qazaqstannyń ár oblysyn atpen aralap shyqqym keledi. Aýyl-aımaqtarda bolyp, jergilikti turǵyndardyń turmys-tirshiligimen tanyssam deımin. Basty maqsatym - osy saıahat arqyly qazaq halqynyń ulttyq salt-dástúrin, mádenıetin pash etý, ár óńirdiń ózindik erekshelikterimen, tarıhymen tanysyp, olardy uǵynyp, jurtshylyqqa durys túsindire bilý», - dedi M. Saǵymbaev.
