Ataqty tennısshi R.Nadal N.Nazarbaevqa óziniń raketkasyn tartý etti (FOTO)
ASTANA. QazAqparat - Elbasy Nursultan Nazarbaev Rafael Nadal men Jo-Vılfrıd Tsonga arasyndaǵy tennıs matchyn tamashalady, dep habarlady Aqordanyń baspasóz qyzmeti.
Memleket basshysy jarys aldynda áıgili tennısshilerdi qabyldap, kezdesý barysynda olardyń osy kelisi elimizdegi tennıstiń budan ári damýy úshin mańyzdy ekendigine toqtaldy.
Tennısshiler Qazaqstanǵa kelý olar úshin úlken qurmet ekenin atap ótti. Olar ózderiniń kleýi jáne match ótkizýi bizdiń elimizde tennıske qyzyǵýshylyqty arttyratynyna senimderin bildirdi. Kezdesýdiń sońynda R.Nadal óziniń raketkasyn Elbasyna tartý etti.
Rafael Nadal men Jo-Vılfrıd Tsonga elimizge sapary aıasynda qazaqstandyq jas tennısshilerge - «Team Kazakhstan» akademııasynyń tálimgerlerine sheberlik dárisin ótkizdi jáne Astananyń kórikti jerlerin aralap kórdi.
Rafael Nadal - ıspandyq tennısshi, Úlken Dýlyǵa týrnıriniń 14 dúrkin jeńimpazy, 2008 jylǵy Olımpıadanyń jeke syndaǵy chempıony, «Altyn dýlyǵa», sondaı-aq Devıs kýbogynyń úsh ret Ispanııa quramasy sapyndaǵy ıegeri.
Jo-Vılfrıd Tsonga - kásipqoı frantsýz tennısshisi, ATP 15 týrnıriniń jeńimpazy, 2012 jylǵy Olımpıada oıyndarynyń erler arasyndaǵy juptyq syndaǵy Kúmis júldegeri, 2014 jylǵy Hopman Kýbogynyń Frantsııa ulttyq quramasy sapyndaǵy ıegeri.
