Ataqty skrıpkashy Marat Bısenǵalıev Oralda óner kórsetti
ORAL. QazAqparat - Búgin ataqty skrıpkashy, Qazaqstannyń eńbek sińirgen qaıratkeri, «Platınaly Tarlan» syılyǵynyń ıegeri Marat Bısenǵalıev BQO qazaq drama teatrynyń foıesinde Almaty sımfonııalyq orkestrimen birge kontsert qoıdy, dep habarlaıdy «QazAqparat» HAA tilshisi.
Álemge tanymal mýzykanttyń 55 jasyna jáne sımfonııalyq orkestrdiń 5 jyldyǵyna oraılastyrylǵan keshte qazaqstandyq jáne sheteldik kompozıtorlardyń klassıkalyq týyndylary oryndaldy. Sonyń ishinde áıgili aǵylshyn kompozıtory Karl Djenkınstiń Marat Bısenǵalıevke arnap jazǵan «Saryqyz» atty týyndysy da bar. Sol sekildi Djoakkıno Rassını, Edvard Elgar, Erkesh Shákeev syndy belgili kompozıtorlardyń shyǵarmalaryn kórermender uıyp tyńdady.
Kontsertti tamashalaǵan Batys Qazaqstan oblysynyń ákimi Altaı Kólginov ataqty óner sańlaǵyn mereıtoıymen quttyqtap, Naýryz merekesi qarsańynda kelip, óner kórsetkeni úshin rızashylyǵyn bildirdi.
Marat Bısenǵalıev aldaǵy ýaqytta da Aq Jaıyq óńirine at basyn buryp, klassıkalyq mýzyka tyńdaýshylaryn qýanta beretindikterin jetkizdi. Erteń ol Oralda sheberlik dárisin de bermekshi.
Aıta keteıik, Marat Bısenǵalıev 1962 jyly Almatyda ómir esigin ashqanymen, onyń Batys Qazaqstan oblysymen tikeleı baılanysy bar. Óıtkeni onyń ákesi Sámet Bısenǵalıev - Bókeı ordasy aýdanynyń týmasy. Kóp jyl Ulybrıtanııada turǵan Marat Bısenǵalıev týǵan jerimen baılanysyn úzbeı, kezinde Oralda skrıpkashylardyń halyqaralyq baıqaýyn, sosyn fılarmonııalyq orkestrdi uıymdastyrǵan bolatyn.
