Ataqty skrıpkashy Marat Bısenǵalıev elordalyq kórermenderdi óziniń jańa mýzykalyq jobalarymen tánti etti

Keshe K.Báıseıitova atyndaǵy Ulttyq opera jáne balet teatrynda ótken M.Bısenǵalıevtiń kontserti elimizdiń belgili qoǵam qaıratkeri, metsenat ári saıahatshy Sapar Ysqaqovtyń mereıtoıyna arnaldy.

2007 jyly Máskeýde ǵasyr metsenaty atanǵan S.Ysqaqov ótken jyly 70 jasqa tolǵan bolatyn. Ol 2007 jyly Ońtústik polıýsten shamamen 100 shaqyrym jerde ornalasqan «Amýndsen-Skott» amerıkandyq stansysynda bolyp, onda Qazaqstan men «Nur Otan» partııasynyń týlaryn ornatqan edi. Al 2008 jyly Jerdiń eń Soltústik núktesinde Qazaqstan týyn jelbiretken edi. Sondaı-aq saǵatyna 2500 shaqyrym jyldamdyqpen zymyraıtyn MIG-29 áskerı ushaǵymen de kókke kóterilgen bolatyn. Ol jer sharynyń 6 qurlyǵynyń 100-den astam elin aralap, Antarktıda men Arktıkaǵa tabany tıgen alǵashqy qazaqtardyń biri.

Daryndy skrıpkashy kórermen nazaryna S.Ysqaqovtyń demeýshiligimen aǵylshyn kompozıtory Erran Baron Koen jazǵan «Zere» shyǵarmasyn oryndady. Kontsert avtory - qazirgi ýaqyttaǵy aǵylshynnyń eń tanymal kompozıtorlarynyń biri Karl Djenkıns. Al M.Bısenǵalıev oryndaǵan «Sary qyz» sıýıtasy buǵan deıin jaryq kórgen «Tilep» jobasynyń logıkalyq jalǵasy bolyp tabylady.
«Uly dala saryny» shyǵarmasyn qazaq kompozıtory Serik Ábdinurov jazǵan bolatyn. M.Bısenǵalıev atalǵan týyndyny skrıpkada oınaýy barysynda ony elordanyń fılarmonııalyq orkestri súıemeldep otyrdy. Dırıjer retinde Qazaqstannyń eńbek sińirgen qaıratkeri Abzal Muhıtdınov, hormeıster retinde Erjan Dáýitov óner kórsetti.