Ataqty Roı Djons Qazaqstanǵa ekinshi márte keledi
ASTANA. QazAqparat - Tanymal amerıkalyq kásipqoı boksshy Roı Djons 14 men 17 tamyz aralyǵynda Rýdnyı qalasyna (Qostanaı oblysy) keledi, dep habarlaıdy «SPORTINFORM» CAA Instagram jelisindegi ergkazakhstan paraqshasyna silteme jasap.
«Roı Djonstyń qoltańbasyn alýǵa jáne ańyzǵa aınalǵan boksshymen sýretke túsýge múmkindik týady. Rýdnyı qalasy ERG II Spartakıadasynyń arnaıy qonaǵyn kútedi. Spartakıadada Roı Djonspen birge chempıondyq tıtýl úshin júretin jekpe-jekti tamashalaý múmkindigin jiberip almańyzdar! Sizderdi 14-17 tamyz aralyǵynda Rýdnyı qalasynyń sport alańynda kútemiz» delingen habarlamada.
Roı Djons buǵan deıin Qazaqstanda bolǵan. Atap aıtqanda, 2016 jyly Ǵalym Jarylǵapovty eske alýǵa arnalǵan dástúrli týrnır kezinde Qaraǵandyǵa kelgen.
Roı Djons orta (IBF nusqasy, 1993-1994), ekinshi orta (IBF nusqasy, 1994-1996), jartylaı aýyr (WBC nusqasy, 1997, 1997-2002 jáne 2003-2004; WBA nusqasy, 1998-2002; IBF nusqasy, 1999-2002), birinshi aýyr (WBU nusqasy, WBF nusqasy) jáne aýyr (WBA nusqasy, 2003) salmaq dárejelerinde álem chempıony bolǵan. Boks jóninde jazatyn Jýrnalısterdiń amerıkalyq qaýymdastyǵy men «Rıng» jýrnaly 1990 jyldary Djonsty «Ońjyldyqtyń boksshysy» dep ataǵan.
Bıylǵy jyldyń aqpan aıynda kásipqoı rıngtegi 75-shi jekpe-jeginde jeńiske jetkennen keıin Roı Djons 49 jasynda mańsabyn aıaqtaıtynyn málimdedi.
Foto: ekaraganda.kz
