Ataqty mýzykant Devıd Boýı mingen Volvo rekordtyq baǵaǵa satyldy
ASTANA. QazAqparat - Áıgili brıtan mýzykanty Devıd Boýı mingen Volvo 262C kóligi Shveıtsarııada ótken aýktsıonda rekordtyq baǵaǵa satyldy.
The Local basylymy málimdegendeı, jádiger kólikti satyp alǵan adam oǵan 212,8 myń shveıtsar frankyn tólegen (shamamen 216 myń dollar). Volvo 262C avtomobıliniń bássaýdadaǵy bastapqy quny 65-75 franktan bastalǵan.
Boýı mingen Volvo 1981 jyly shyǵarylǵan. Mýzykant ony 1998 jylǵa deıin paıdalanypty. Osy ýaqyt ishinde kólik bary-joǵy 53 myń shaqyrym ǵana júrgen.
Devıd Boýı 2016 jyldyń qańtarynda, 69 jasynda baýyrdyń qaterli isiginen qaıtys bolǵan edi. Óziniń karerasynda brıtan tarıhyndaǵy eń myqty mýzykanttardyń ondyǵyna kirip, 136 mıllıonnan astam mýzykalyq jazba ónimderin satqan.
