Ataqty L. Hozashvılı Chaıkovskııdiń «Aqqý kólinde» Zıgfrıd shahzadanyń partııasyn oryndaıdy - «Astana Opera» teatry

Balettik spektakl alǵashqy «Jibek Joly» halyqaralyq festıvali aıasynda usynylyp otyr, dep habarlaıdy «Astana Opera» teatrynyń baspasóz qyzmetinen. «Men álemniń eń jaqsy teatrlarynyń biri bolyp sanalatyn «Astana Opera» tamasha teatry jaıly kóp estidim. Bul Melpomena ordasy óziniń kúlli mádenı keńistiktegi eń qyzyqty jáne bolashaǵy zor óner oshaǵy ekenin búkil álemge málimdegenin atap ótkim keledi. Eger naqty qazaqstandyq balet jaıly sóz qozǵasaq, bul jerde tamasha deńgeıli klassıkalyq mektep baryn bilemin. «Jibek Joly» ispettes festıvaldar men dúnıe júzi boıynsha ótip jatqan ózge konkýrstardyń arqasynda Erlan Ańdaǵulov jáne Dosjan Tabyldy sııaqty Qazaqstannyń ártisterimen tanysyp úlgerdim, biz jaqsy dostarmyz jáne men olardyń kásibı deńgeıin joǵary baǵalaımyn», - deıdi Lasha Hozashvılı. Bostondyq Balettiń premeri álemdik dárejedegi «Jibek Joly» festıvali sheńberinde astanalyq sahnada óner kórsetý, óziniń mansap jolyndaǵy jaýapty kezeń ekenin de atap ótti. «Aqqý kóli» baletindegi Zıgfrıd partııasy -klassıkalyq erkekter bıiniń úlgisi bolyp tabylady. Atalǵan partııa jan dúnıeme jaqyn. Al Shahzadanyń rólin oınaǵan kezde balet óneriniń tamasha áleminde janymnyń qalaı shyrqap sala beretinin sezemin», deıdi ol. Lasha Hozashvılı teatr qonaqtaryna, folklorlyq saryn jáne bozbala men boıjetkenniń názik sezimderi jaıly qupııaly tereń oı negiz bolǵan eń syrǵa toly jáne sıqyrly klassıkalyq balet - «Aqqý kóli» spektaklinen lázzat alýdy tiledi.

Anyqtama: Lasha Hozashvılı Tbılısıde, Grýzııada dúnıege kelgen. 2010 jyly Bostondyq Balet quramyna premer retinde kirdi. 1994 pen 2002 jyldar aralyǵynda V. Chabýkıanı atyndaǵy Tbılısıdegi horeografııalyq ýchılışesinde oqyǵan. Keıin Z. Palıashvılı atyndaǵy Tbılısıdegi memlekettik opera jáne balet teatrynyń balettik trýppasyna jetekshi solıst retinde qabyldandy.

Grýzııanyń Memlekettik baleti quramynda bılep júrgen kezinde ony «Ballet Dance» jýrnaly «erler trýppasyndaǵy eń sezimtal bıshi» dep atady. 2008 jyly ol Jılber Alber jáne Nına Ananıashvılıdiń «Juldyz» halyqaralyq syılyǵymen marapattaldy.

Hozashvılı Grýzındyq Memlekettik balettiń AQSh-ǵy (2007 jáne 2008 jyldar) jáne Japonııadaǵy (2007) gastroline qatysty. Sondaı-aq ol «Spoletto» jáne «Djeıkobs Pılloý» festıvaldarynda «Aqqý kóli» men «Don Kıhotta» basty partııalarda, sonymen qatar Djordj Balanchınniń «Motsartıana» ján «Duo Concertant» baletterinde óner kórsetti. Búgingi tańda -Boston Baletiniń premeri.