Ataqty frantsýz sýretshisi Saýlo Merkader Elbasy N. Nazarbaevtyń portretin salý ústinde
ASTANA. 12 shilde. QazAqparat - Búgin Astanada ataqty frantsýz sýretshisi, músinshi, kórkemsýret óneriniń doktory Saýlo Merkaderdiń jeke kórmesi ashyldy.
«Men Astanadan úlken rýhanı baılyq pen shyǵarmashylyq áser aldym. Tipti osynda jumys isteýden bas tartpaýshy edim. Bul ózgeshe jáne óte tamasha el. Men qazaqtyń uly aqyny Abaıdy ózimniń rýhanı jolbastaýshym, pikirlesim dep esepteımin. Sebebi men Abaıdaı oılaımyn, birdeı sezinemin jáne birdeı tynystaımyn. Abaı - meniń rýhanı aǵam», - deıdi úlken áserge bólengen kórme avtory S. Merkader.
Frantsýzdyq qylqalam sheberiniń aıtýynsha, qazirgi ýaqytta sýretshi Parıjdegi atelesinde Qazaqstan Prezıdenti N. Nazarbaevtyń portretin salý ústinde.
«Ol týyndy bir jyldan keıin bitip qalýy múmkin. Onyń qandaı antýrajda bolatyny ázirshe qupııa qalsyn. Bir jyldan soń osynda bas qosyp, ol qupııany aldaryńyzda ashatyn bolamyn», - dedi bir tosyn syıy baryn aıtyp qalǵan Saýlo.
«Has Sanat» óner galereıasynyń dırektory Janna Eńsebaevanyń aıtýynsha, kórme Frantsııanyń ulttyq kúni qurmetine arnalǵan.
«Saýlo Merkaderdiń kórmesi Astananyń mádenı ómirindegi eleýli oqıǵa. Saýlo qazaqtyń Sáýle esimi sııaqty Ispanııada, Izraılde «kún shýaǵy» degen sózdi bildiredi. Shynymen de ol qazaqtardyń mádenı saltyna asa qushtar ári jan-dúnıesi osy halyqqa jaqyn jandardyń biri. Álemdik deńgeıdegi qylqalam sheberin Astanaǵa kelýin uıymdastyrý asa qıyn boldy. Ótken jyly jeltoqsanda sýretshi Saýlo elordada jeke kórme ashýǵa kelisimin berdi. Sodan beri ol Qazaqstanǵa arnap 40-tan astam týyndy salyp, osy kórmege daıyndap ákeldi», - dedi ol.
Saýlo Ispanııada dúnıege kelgen. 1974 jyldan beri ol Frantsııada ósti, oqydy, jumysyn bastady. Ataqty Kolýmbııa ýnıversıtetin támamdaǵan ol, qazir shyǵarmashylyqpen qatar ýnıversıtette ustazdyq etýde, kórkemsýret óneriniń doktory, Frantsııanyń óner jáne ádebıet ordeniniń komandory.
