Ataqty boksshy, álem chempıony Habıb Nurmagomedov Qazaqstanda sheberlik sabaǵyn ótkizedi
ASTANA. QazAqparat - 5 maýsym kúni saǵat 12.00-de «Qazmedıa ortalyǵy» ǵımaratynyń 11-qabatynda Qazaqstannyń MMA Federatsııasy qazaqstandyq birinshi sport arnasy «Qazsport» telearnasymen birlese otyryp, kúres sambosy boıynsha álem chempıony, UFC boksshysy Habıb Nurmagomedovtyń qatysýymen baspasóz máslıhatyn ótkizedi, dep habarlady «Qazaqstan» ulttyq telearnasynyń baspasóz qyzmeti.
Uıymdastyrýshylardyń habarlaýynsha, H.Nýrmagomedov Qazaqstanda alǵash ret MMA tehnıkasy boıynsha (aralas jekpe-jek) sheberlik sabaǵyn kórsetedi. «Qazsport» telearnasy atalǵan semınardy óziniń televızııalyq habarlarynda jparııalaıdy.
Álemdik MMA juldyzynyń semınary 5 maýsym kúni saǵat 18.00-de Astana qalasyndaǵy «Eýrazııa» sport kesheniniń ǵımaratynda (Dúkenuly kósh., 18) jáne 6 maýsym kúni saǵat 11.00-de Almaty qalasyndaǵy joǵary sport sheberliginiń mamandyrylǵan mektebinde (Aqsaı-1 yqsham aýdany, 10 úı) ótedi.
Habıb Nýrmagomedov - Ultimate Fighting Championship qamqorshylyǵymen kúrestiń aralas túrlerindegi kásibı boksshy, jeńil salmaqta óner kórsetip, álemdik úzdik boksshylardyń ekinshi kezeńinde tur. Reseı chempıonatynyń jeńimpazy, qol kúresi boıynsha Kýbok ıegeri jáne Eýrazııa chempıony, Reseı chempıony, kúres sambosy boıynsha álemniń eki dúrkin chempıony, pankratıon boıynsha Eýropa chempıony, NAGA Grappling nusqasy boıynsha grepplıng boıynsha álem chempıony. M-1 Global-dyń birneshe týrnırlerine qatysty. 22 kásibı kúresti jeńilissiz aıaqtady. Jeńil salmaqtaǵy UFC úzdik boksshylarynyń ondyǵyna kiredi.
MMA (Mixed Martial Arts) aralas kúres jekpe-jegi - búginde Qazaqstan Respýblıkasynda úlken qarqynmen damyp kele jatqan sport túri bolyp tabylady. MMA tanylǵan sport túri retinde 2013 jyly ǵana resmı mártebeni ıelengenine qaramastan, Qazaqstannyń MMA Federatsııasynyń kúsh salýymen Qazaqstan Respýblıkasynyń ulttyq quramasynyń sportshylary halyqaralyq deńgeıde moıyndalyp, Qazaqstan álemdik reıtıngte ekinshi oryndy, al Azııa qurlyǵynda birinshi oryndy ıelenip, MMA álemdik elıtasynyń quramyna endi.
