Ataqty basketbolshy Kobı Braıant tikushaq apatynan qaza boldy
ATLANTA. QazAqparat - Jeksenbi kúni tańerteń Kalıfornııa shtatyndaǵy Kalabasas qalasynda bolǵan tikushaq apatynan qaza tapqan toǵyz adamnyń ishinde tanymal basketbolshy Kobı Braıant pen onyń qyzdarynyń biri bar, dep habarlaıdy QazAqparat.
CNN telearnasynyń habarlaýynsha, 41 jastaǵy Braıant pen onyń 13 jastaǵy qyzy Djanna Marııa Onore Braıant Taýzand-Okstaǵy mamba sport akademııasyna jattyǵýǵa bet alǵan.
Los-Andjeles okrýginiń órt qaýipsizdigi qyzmetiniń basshysy Derıla Osbıdiń aıtýynsha, Los-Andjelestiń ortalyǵynan soltústik-batysqa qaraı 30 mıll jerde tikushaq apatqa ushyrap, otqa oranǵan. Apat saldarynan bortta bolǵan toǵyz adamnyń barlyǵy qaza tapty, delingen Los-Andjeles okrýgi sherıf departamentinde.
Buǵan deıin sherıf departamenti apat saldarynan bes adam qaza bolǵanyn málimdedi.
Tonı Altobellı CNN-ge óziniń aǵasy, beısboldan Orange Coast kolledjiniń jattyqtyrýshysy 56 jastaǵy Djon Altobellı, Djonnyń qyzy Alıssa men áıeli Kerı de áýe apatynan qaza tapqanyn habarlady. Altobellı beısboldan Hıýston ýnıversıtetinde jattyqtyrýshynyń burynǵy kómekshisi bolǵanyn málim etti.
Apattan qaza tapqandardyń ishinde Kalıfornııa shtatynyń Korona-del-Mardaǵy Harbor Day School mektebinde basketboldan qyzdar jattyqtyrýshysynyń kómekshisi Krıstına Maýzer bar dep jazdy onyń kúıeýi Mett Maýzer Facebook-taǵy paraqshasynda.
Los-Andjeles okrýginiń órt qaýipsizdigi departamentiniń kapıtany Tonı Imbrenda «Sıkorskıı S-76B» tikushaǵynyń apat sıgnalyn bergen-bermegeni týraly aqparat joq ekenin aıtty.
«Tikushaq 1991 jyly qurastyrylǵan» dep habarlaıdy Federaldy avıatsııa basqarmasy. Federaldy avıatsııa basqarmasynyń tirkeý derekter bazasyna sáıkes, ol Island Express Holding Corp kompanııasynda tirkelgen. Federaldy avıatsııa basqarmasy jáne Kólik qaýipsizdigi jónindegi ulttyq keńes apatqa qatysty tergeý júrgizýde delingen basqarmada.
CNN meteorology Maıkl Gaıdyń aıtýynsha, apat kezinde tuman túsip, nóser jańbyr jaýǵan. Sonyń saldarynan joldyń kórinýi tómen bolǵan.
