Ataqty balýan Sergeı Beloglazov qazaqstandyq sportshylardy jattyqtyrýǵa kiristi
ASTANA. QazAqparat - Ataqty balýan Sergeı Beloglazov jattyqtyrýshy-keńesshi retinde qazaqstandyq sportshylarǵa tálim berýge búgin kiristi. Búgin ol grek-rım, erkin jáne áıelder kúresinen QR kýbogyna arnalǵan baspasóz máslıhatynda kópshilikke tanystyryldy.
«Qazaqstandyq federatsııaǵa osyndaı jaýapkershiligi mol jumysqa shaqyrǵanyna rahmet. Árıne men kóptegen elderde kóptegen komandalarmen jumys istedim, alaıda osy joly ulttyq quramany Olımpıadaǵa, Azııa chempıonattaryna daıyndaý senip tapsyrylyp otyr. Sondyqtan bul sharýaǵa asqan jaýapkershilikpen kelý kerek dep oılaımyn», - dedi S.Beloglazov.
Onyń aıtýynsha, ózine kep túsken kóptegen usynystardyń ishinen Qazaqstandy tańdaǵan kórinedi. Óıtkeni qazaqstandyq komandanyń áleýeti joǵary.
«Komanda bar. Men sportshylarmen de, jattyqtyrýshylarmen de tanystym. Komandanyń áleýeti jaqsy. Meniń tapsyrmam bir jaǵynan qıyn, ekinshi jaǵynan ońaı dep aıtýǵa bolady. Óıtkeni maǵan óz tájirıbemdi, tehnıkamdy, tipti keıbir taktıkalyq nıýanstarymdy osy sportshylarǵa berý qajet. Sondyqtan men qolymnan kelgenniń barlyǵyn jasap, bul iske barynsha kásibılik turǵydan kelýge tyrysamyn», - dedi ol.
Aıta keteıik, balýanmen aradaǵy kelisim 2 jylǵa, ıaǵnı kezekti jazǵy Olımpıada oıyndaryna deıin jasalǵan.
«Ýaqyt tym az. Óıtkeni kelesi jyly oıyndarǵa irikteý bastalady. Eki jyl degen kózdi ashyp-jumǵansha óte shyǵady, sondyqtan maǵan jumysqa tez arada bel sheship kirisip ketý kerek», - deıdi S.Beloglazov.
Eske sala keteıik, Sergeı Beloglazov eki dúrkin Olımpıada chempıony (1980, 1988, alty márte álem chempıony jáne Eýropa men KSRO-nyń kóp márte jeńimpazy. Sondaı-aq onyń jattyqtyrýshy retindegi tájirıbesi de mol.
