Ataqty ázerbaıjandyq velojıhangezdi Qazaqstanda qasqyr jep qoıa jazdaǵan
ASTANA. QazAqparat - Ataqty ázerbaıjandyq velojıhangez Ramıl Zııadovty Qazaqstanda qasqyr jep qoıa jazdaǵan. Bul týraly ol ýkraınalyq jańalyqtar portalyna bergen suhbatynda áńgimelegen.
Aıta keterligi, Ramıl Zııadov búkil Eýrazııany velosıpedpen sharlap shyqqan jıhangez. Osy saparynda ol úsh ret ólim aýzynan qalypty. 38 jastaǵy Ramıl «dala samaly» atalatyn velosıpedimen úsh jyl boıy Eýropa men Azııany aralap shyqqan. Ózbekstan, Qazaqstan, Novosibir men Tolıattıdi basyp ótip, sosyn Mýrmanskidegi Polıar sheńberine deıin jetken.
Osyndaı álemdik saparlarynda velojıhangez úsh ret ólim aýzynan qalǵanyn áńgimeleıdi. Birinshisi aǵyp jatqan las ózenniń sýynan iship, ishek taıaqshasyn juqtyrǵan eken. Sonyń saldarynan úsh kún boıy ormanda adasyp, shyǵa almaı júrgen. Ekinshi jaǵdaı - Alpi shyńdaryn baǵyndyrý barysynda qar kóshkinine tap bolǵan. Taý shyńynda qamalǵan ol, aqyrynda jol taýyp maqsatyna qol jetkizgen. Al Qazaqstandaǵy jazyq dalalardyń birinde ol bir top qasqyrdan áreń qashyp qutylǵan eken. «Tipti sol qasqyrlardyń birimen jekpe-jektegi sekildi kózben atysýǵa da týra keldi», dep áńgimeleıdi Rammıl.
Eske salaıyq, Ramıl Zııadov 2013 jyly álemniń bes memleketi boıynsha velotýr jasady, alty aı ishinde ol Ázerbaıjan jalaýyn jelbiretip Reseıdi, Qazaqstan, Ózbekstan, Qyrǵyzstan men Qytaıdy velosıpedpen aralap shyqty. Al 2015 jyly Ramıl «Ázerbaıjan dańqy úshin» atty álemdik týrneni júzege asyrdy.
