Ataqty Almaty aportyna arnap mýzeı ashyldy
ALMATY. QazAqparat - «Almaty» qonaqúıinde Alma Museum mýzeıiniń ashylý saltanatynda Sıvers alma baǵy men ańyzǵa aınalǵan Aporttyń tarıhy aıtyldy, dep habarlaıdy QazAqparat tilshisi.
Kelýshiler «Gorod ıablochnyh snov» mýltımedıalyq ekspozıtsııasynan áıgili almatylyq almalardyń tarıhyn tamashalap qana qoımaı, tyń derektermen qanyqty.
«Búkil qalalyqtar eski Almatyny ańsaıtyn sııaqty. Biz qalamyzǵa ejelgi alma mádenıetin qaıtarǵymyz keledi. Qalaǵa kelýshiler alma baqtary men olardyń ıisine ǵashyq bolatyn. Osyndaı áserlerdi qaıtadan sezingimiz keledi. Bul mýzeı qalamyzǵa qajet birden-bir oryn», - dedi Alma museum mýzeıiniń birlesken uıymdastyrýshy ári arhıtektory Janna Spýner.
Arhıtektor Janna Spýner men «Almaly Jumaq» qoǵamdyq qorynyń basshysy Ajar Jandosova Almatynyń almalary úshin mýzeı uıymdastyrýdy eki jyldan beri josparlap kelgen. Olar Almatyǵa gúldengen baqshaly qala ataǵyn qaıtaryp berýdi kózdep otyr.
«Biz almaǵa qatysty qujattar men fotosýretterdi jınadyq. Ásirese, barlyq derlik alma sorty ósirilgen Sıvers alma baǵynyń materıaldary óte kóp. Biz almaly ólkemiz. Ókinishke oraı, qolda bardy baǵalamaımyz. Eki ret alma baǵyn joǵalttyq. Áý basta Almaty baýraıyndaǵy alma ormandarynan aıryldyq. Mádenı baqtar salý úshin olardyń kózin qurtty. Al 90 jyldarda qalany ulǵaıtý saldarynan qanshama alma aǵashy joıyldy», - dedi Ajar Jandosova.
Mamandardyń aıtýynsha, almatylyq aport negizinen Sıvers alma aǵashynyń jaı alma aǵashymen telinýinen paıda bolǵan.
«Aporttyń «ákesi» - Egor Redko. Ol 1865 jyly Reseıden birneshe alma kóshetin alyp kelgen. Alaıda ol sorttardyń eshqandaı ereksheligi bolmaǵan. Aǵashtardy Sıvers almalarymen tuqymdastyrǵannan keıin alma aǵashy erekshe jemis bere bastady. Ol kisi alma patshasy desek te bolady. Biz de ony patshamyz dep sanaımyz. Ol ósirgen almalar óte úlken ári hosh ıisti. Endi bolashaqqa senimmen qaraımyz. Elimizdegi alma kásibin jandandyrý úshin bul taqyrypty keńinen qozǵaımyz. Alma - bizdiń aıryqsha qundylyǵymyz. Olardy joǵaltýǵa bizdiń eshqandaı quqyǵymyz joq», - dedi A. Jandosova. 
«Gorod ıablochnyh snov» kórmesi kelesi jyldyń 20 qańtaryna deıin jalǵasady. Kórmeden soń kelýshiler nazaryna áıgili jemis týraly qyzyqty oqıǵalar, ańyzdar men ertegiler usynylady.
