Ataq pen aqsha qoldyń kiri, al tarıh máńgi el esinde qalady – Paralımpıada chempıony Erbol Hamıtov
ASTANA. KAZINFORM – Italııanyń Tesero qalasynda ótken jarysta 2026 jylǵy qysqy Paralımpıada oıyndarynyń altyn júldesin ıelengen qazaqstandyq para sportshy Erbol Hamıtov Kazinform tilshisine suhbat berip, aldaǵy josparlarymen bólisti.
Búgin Erbol Hamıtov Paralımpıada oıyndarynda altyn medal jeńip aldy. Bul jeńis 2026 jylǵy qysqy Paralımpıadada Qazaqstannyń ánurany shyrqalǵan alǵashqy jaǵdaı boldy. Biz aldymen chempıonnan jeńisten keıingi alǵan áserin suradyq.
– Erbol, jeńis qutty bolsyn! Paralımpıadada jaqsy nátıje kórsetýge ne áser etti?
– Paralımpıadadaǵy alǵashqy eki para bıatlon jarysy men úshin sátsiz ótti. Osy eki jarystaǵy qatelikterdi jattyqtyrýshylarymmen aqyldasyp otyryp túzettik. Shveıtsarııadaǵy oqý-jattyǵý jıynynda Paralımpıadaǵa daıyndyqty jalǵastyrdyq. Bizde birlesken jarys ótti, ol qýdalaý jarysy dep atalady. Bul jarysta sportshylar irikteý nátıjesine qaraı fınıshke jeke shyǵady, ár jiberilgen oq úshin 150 metrlik aıyppul júgi qosylady. Búgingi basty maqsatym jattyǵýdaǵydaı dál atý boldy. Týrnırdiń kúıbeń tirliginen alystap, basqa oılardan arylyp, jattyǵýdaǵydaı kóńil-kúımen jarysqa shyqtym. Nátıjesinde altyn medalge qol jetkizdim.
— Altyn medal qorjynda, endigi maqsat-josparlaryń qandaı?
— Men bul jetistikpentoqtap qalmaımyn. Josparymda jazǵy Paralımpıada sportynda, atap aıtqanda paralımpıadalyq kanoede synǵa túsip, jazǵy Paralımpıada oıyndaryna joldama alý bar. Óz múmkindikterimdi tolyq paıdalanyp, bar kúshimdi salamyn. Men áli jaspyn jáne elimizdiń, ásirese jas urpaqtyń úmitin aqtaýǵa umtylamyn. Baı otbasynyń ókili emespin, biraq ózime, otbasym men jaqyndaryma, sondaı-aq aınalamdaǵy adamdarǵa kómektese alatyn jaǵdaıǵa jetkim keledi. Jeńisten keıin de ózimdi qatań baqylaýda ustaımyn. Qazaqstannyń óskeleń urpaǵyna jaqsy úlgi bolýǵa tyrysamyn. Keıbir sportshylar jeńiske jetken soń ataq pen dańqqa ǵana kóńil bóledi, biraq men úshin eń mańyzdysy – Qazaqstan men álemdik sport tarıhynda óz ornymdy saqtaý. Ataq pen aqsha qoldyń kiri, al tarıh máńgi qalady. Barsha qazaqstandyqtarǵa qoldaýlary úshin alǵys aıtamyn.
– Tarıhta Paralımpıada chempıony atanǵan tuńǵysh qazaq sportshysy bolý siz úshin qanshalyqty mańyzdy?
– Bul týraly áli naqty oılaǵan joqpyn. Basty maqsatym – Paralımpıada chempıony bolý. Meniń jeńisim – jattyqtyrýshylar, kómekshiler jáne keńesshilerden quralǵan komanda jumysynyń nátıjesi. Qıyndyqtar boldy, biraq biz olardy eńserip, jumysymyzdy áli de jalǵastyryp jatyrmyz.
– Suhbatyńyzǵa rahmet! Aldaǵy jarystarda sáttilik serigińiz bolsyn!