Ata jurtyńda óner kórsetip, abyroıyn asqaqtatqanǵa ne jetsin – «Qazaq jaýyngeri»

Mine, osyndaı mıllıardtardy moıyndatqan Islamdy týǵan kıeli mekennen taǵy bir qazaqtyń qaradomalaq uly qanatyn qomdap, kásipqoı boksty baǵyndyra bastady. Ol - Qytaıda «Qazaq jaýyngeri» degen laqap atymen tanymal bolǵan Elshat Nyǵmetollauly.

Qandasymyz QazAqparat tilshisine suhbat berip, Astanada Táýelsizdik kúni merekesine oraı ótetin kásipqoı boks keshine baılanysty daıyndyq jumystary týraly aıtyp berdi.

- Elshat Astanaǵa qosh keldińiz ?

- Rahmet!

- Elordaǵa alǵash kelýińiz ba ?

- Iá, birinshi ret! Sondyqtan da shyǵar óte bir erekshe áserde júrmin. Qazaq eliniń astanasynda, ıaǵnı Alashtyń aqordasynda táýelsizdik merekesine oraı alǵash aıqasym ótkeli otyr. Bul men úshin úlken baqyt, úlken abyroı. Sol úshin aldaǵy 16 jeltoqsan kúngi ótetin jekpe-jegime Astana turǵyndary men qonaqtaryna esten ketpeıtin boks keshin syılaǵym kelip otyr. Ata-jurttaǵy alǵashqy aıqasyma barsha qazaqstandyqtardy shaqyramyn.

- Qalyń kópshilik «Qazaq jaýyngeri» nendeı erlik jasar eken dep jekpe-jegińizdi taǵatsyzdana kútip otyrǵany ras. Desek te sportsúıer qaýym Siz týraly kóp bile bermeıdi.

- Esimim - Elshat. Ákemniń aty - Nyǵmetolla. Qytaıdaǵy Altaı aımaǵy, Qaba aýdanynda 1994 jyly dúnıege keldim. Beıjiń Olımpıadasynyń qola júldegeri Qanat Islamdy búginde qazaq eli ǵana emes, álem tanıdy. Mende sol mekennen ómir esigin ashtym. Boksqa kelýimizge osy Qanat aǵamyz sebepker boldy. Biz osy aǵamyzdy úlgi tutyp óstik.

- Jalpy «Qazaq jaýyngeri» atanýyńyzdyń syry nede?

- Bul jaı tańdalǵan laqap at emes. Qazaq ejelden jaýynger halyq ekeni barshamyzǵa belgili. Men sol úshin mıllıardtar eline qazaqtyń qandaı ult ekenin dáleldeý úshin osy laqap atty tańdadym jáne dáleldegim keldi, dáleldep kele jatyrmyn.



- Qytaıda qandaı jetistikterge qol jetkizdińiz?

- Qytaıda 53,5 keli salmaqta WBO tujyrymy boıynsha Qytaı chempıony jáne WBC tujyrymy boıynsha Azııa chempıony ataǵyna qol jetkizdim. Bul Qytaıda kez-kelgen boksshyǵa buıyra bermeıtin ataq. Osy jetistikterdiń arqasynda álemdik reıtıngtegi eń myqty 100 boksshynyń qataryna, al Qytaıda óz salmaǵymda kósh bastadym.

- Sporttaǵy jetisikterińizge qaraǵanda boksqa erte jastan bet burǵan sııaqtysyz ?

- Bastaýysh synypty bitirgennen keıin, aýyldan qalanyń ortalyǵynda ornalasqan mektepke aýystym. Qysqy demalys kezinde «Boks úıirmesine shaqyramyz» degen jarnamaǵa kózim túsip, kýrsqa jazyldym. Osylaısha 15 jasymda jarty jyldyń ishinde Altaı chempıony atandym.



- Alǵashqy boks «álippesin» kim úıretti ?

- Qanat Islamnyń alǵashqy bapkeri Murat Boshaıuly týraly bokssúıer qaýym jaqsy biletin bolýy kerek. Meniń de alǵashqy ustazym osy kisi. Ol bokstyń qyr-syryn úıretip qana qoımaı, din men dilimizdi, ulttyq qundylyqtarymyzdy qasterleýdi úıretti. Bizdiń babalarymyzdyń batyr bolǵanyn sanamyzǵa quıyp otyrdy. Qytaıda júrse de ulty úshin mańdaı terin tógip, eleýli eńbek etken adam. Kóptegen qazaq balasyn sportqa baýlyp, tálim-tárbıe berdi. Meniń de úlken jetistikterge qol jetkizýime sebepker boldy.

- Kásipqoı boksqa kelýińizge ne sebep boldy ?

- Qytaıda áýesqoı boksta top jarý - Olımpıadany baǵyndyrýmen birdeı. Biz úshin, ıaǵnı az ulttar úshin áýesqoıda bıikterdi baǵyndyrý óte qıyn. 2012 jyly Shyńjańda ótken chempıonatta 52 keli salmaqta qarsylas shaq keltirmedim. Biraq, Shyńjańda eki jyldaı úlken dodalarǵa qatysa almadym. Osylaı júrgende Qytaıdyń ishki ólkesindegi bir úlken kompanııadan usynys tústi. Men kelisimimdi berdim. Osylaısha úlken sporttaǵy jolym ashyla bastady. Biraq, aralyqtaǵy qıynshylyqtarymdy aıtpaı-aq qoıaıyn.




- Jaqsy, kásipqoı bokstaǵy alǵashqy jeńisińizdi eske túsire ketseńiz ?

- 2014 jyly kásipqoı bokstaǵy alǵashqy jekpe-jegimdi ótkizip, jeńiske jettim. 2016 jyly WBA tujyrymy boıynsha Qytaı chempıony atanyp, altyn belbeýge ıe boldym. Odan keıin WBC tujyrymy boıynsha Azııa chempıony atandym. Osydan bir-eki aı buryn Qytaıǵa baryp taǵy bir jekpe-jek ótkizip keldim.



- Qazaqstanǵa kelgenińizge jalpy qansha ýaqyt boldy ?

- Bıyl kelip otyrmyn. Almatyda úsh aı jattyǵyp, arasynda Qytaıǵa baryp bir jekpe-jek ótkizip keldim. Odan beri bir aı boldy.

- Bul jaqta qaı bapkermen jumys jasap jatsyz ?

- Qazir Janqosh Turarovtyń ustazy, kezindegi Ardaq Nazarovty baptaǵan belgili bapker Saǵatbek Musahanovtyń qol astynda jattyǵyp jatyrmyn. 16 jeltoqsan kúni osy bapkerim meni rıngke alyp shyǵatyn bolady.



- Bolashaqta Qazaqstanda qalǵyńyz kele me ?

- Árıne, óz elińde, atajurtyńda óner kórsetip abyroıyn asqaqtatqanǵa ne jetsin. Aldaǵy ýaqytta azamattyq alý máselesin de sheshemin degen oıdamyn.

- Bul jolǵy qarsylasyńyz týraly ne aıtasyz? Burynnan bilesiz be ony ?

- Burynnan tanystyǵym joq. Bir biletinim jeńilip kórmegen ázerbaıjandyq boksshy Farıd Alıev. Ol buǵan deıin 5 jekpe-jek ótkizip, barlyǵynda nokaýtpen jeńiske jetipti.



- Bizdiń bilýimizshe boks keshi Qanat Islamnyń «QAZAQ promotions» promoýterlik kompanııasynyń uıymdastyrýymen ótkeli otyr. Bul boks keshindegi jekpe-jegiń halyqaralyq kásipqoı boks federatsııasynyń resmı tirkeýine kire me?

- Joq, kirmeıdi. Qytaıda da osyndaı aıqastar bolǵan. Negizi, men 16 jekpe-jek ótkizgem. Barlyǵynda jeńiske jettim. Alaıda, naqty kásipqoı boks keshinde 14 ret óner kórsetippin.

- Áńgimeńizge rahmet! Aldaǵy aıqasyńyzǵa sáttilik tileımiz...