«Ata joly» kartasyn qansha qandas aldy
ASTANA. KAZINFORM – Migration.enbek.kz portaly aıasynda joǵary bilikti suranysqa ıe sheteldik mamandardy tartý úshin modýl jasalyp jatyr. Bul týraly Senat depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan.
«Memleket basshysynyń tapsyrmasy boıynsha ótken jyldan bastap etnıkalyq qazaqtar úshin «Ata joly» kartasyn berý boıynsha otandyq platforma iske qosyldy. Qazirgi ýaqytta bul jumys Qazaqstan Respýblıkasynyń 44 sheteldik mekemesimen «Qandas» AAJ mobıldi qosymshasy arqyly avtomattandyrylǵan rejımde júrgiziledi. 2024 jyldyń 20 naýryzynda 44 etnıkalyq qazaq (barlyǵy otbasy múshelerimen 110 adam) «Ata joly» kartasyn aldy: 23 adam (otbasy múshelerimen 48) - suranysqa ıe mamandyqtar boıynsha, 21 adam (otbasy múshelerimen 62) - bıznes-ımmıgrant retinde», - dep atat ótedi vıtse-premer jaýabynda.
Onyń atap ótýinshe, «suranysqa ıe mamandyqtar» boıynsha kartany alǵandardyń sapalyq taldaýyna sáıkes, kartanyń 23 ıegeri arasynda ınjener-fızık, ınjener-matematık, gaz-munaı qubyrlaryn jobalaý jáne paıdalaný, kompıýterlik baǵdarlamalyq qamtamasyz etý jáne esepteý tehnıkasy, hımııalyq tehnologııalar, sý asty ınjınırıngi, qoldanbaly matematıka, ushaq qurylysy, korporatıvtik quqyqtaný mamandary, sondaı-aq jaq-bet hırýrgııasy dárigerleri, pedıatrlar jáne basqa da mamandar bar. Al kartany bıznes-ımmıgrant retinde alǵan 21 adamnyń ishinde melıoratsııa, rekýltıvatsııa jáne jerdi qorǵaý, fızıka jáne ınformatıka, aýyl sharýashylyǵyn mehanıkalandyrý mamandary, dárigerler jáne shetelde jumys isteıtin bıznesi bar kásipkerler kezdesedi.
«Sonymen qatar shetel azamattary úshin kóshi-qon salasyndaǵy memlekettik qyzmetter týraly tolyq jáne egjeı-tegjeıli aqparatty qamtamasyz etý úshin «migration.enbek.kz» portaly ázirlendi. Portal aıasynda joǵary bilikti suranysqa ıe sheteldik mamandardy tartý úshin modýl jasalyp jatyr», - dedi Tamara Dúısenova.
