«Ata joly» kartasyn qansha etnıkalyq qazaq aldy
ASTANA. KAZINFORM – «Ata joly» kartasyn ustaýshylarǵa «bir ótinish» qaǵıdaty boıynsha turaqty turýǵa ruqsat alýdyń ońaılatylǵan tártibimen múmkindikter berilmek. Bul týraly Senat depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan.
«2023 jyldyń maýsym aıynda shetelde turatyn etnıkalyq qazaqtar úshin «Ata joly» kartasy engizildi. Búgingi tańda 55 ótinim (124 adam) maquldandy. Onyń ishinde 25 kartany (67 adam) bıznes-ımmıgranttar jáne 30 kartany (57 adam) suranysqa ıe kásip ıeleri aldy», - dedi vıtse-premer.
Tamara Dúısenovanyń jaýabyna berilgen anyqtamaǵa sáıkes, «suranysqa ıe mamandyqtar» boıynsha 11 eldiń azamattary kartany aldy: Reseıden 15 adam, Germanııadan 4 adam, Mońǵolııa men QHR-dan 2 adam, AQSh, Izraıl, Nıderlandy, Ózbekstan, Qyrǵyzstan, Fınlıandııa jáne Avstrııadan 1 adam. «bıznes-ımmıgrant» retinde kartany 10 elden aldy: Reseıden 12 adam, Aýǵanstannan 3 adam, QHR men Mońǵolııadan 2 adamnan, Avstrııa, Izraıl, Germanııa, Túrkııa, Ózbekstan jáne Túrikmenstannan 1 adamnan.
«Ulttyq qaýipsizdikti qamtamasyz etý maqsatynda ishki ister organdarynyń aýmaqtyq bólimshelerine «Ata joly» kartasyn alýǵa ótinish bildirgen ótinish berýshi týraly (terrorıstik nemese ekstremıstik uıymdarǵa jatatyndyǵy, tıisti óńirlerdiń ulttyq qaýipsizdik organdarynda quqyq buzýshylyq jasaǵany týraly aıyptaý málimetteriniń bar-joǵyn tekserýdi júzege asyrý) tıisti saýaldar jiberý bóliginde zańnamalyq ózgerister engizildi. Budan basqa, karta ustaýshylarǵa „bir ótinish“ qaǵıdaty boıynsha turaqty turýǵa ruqsat alýdyń ońaılatylǵan tártibimen múmkindikter berý bóliginde zańnamalyq túzetýler engizilýde. 2024 jyldyń 24 mamyrda Úkimette meniń tóraǵalymymmen „Ata joly“ kartasyn alǵan azamattarmen kezdesý ótkizildi. Kezdesý barysynda kartany alý tetikterin jetildirý, jumysqa ornalasý, bıznesterin damytý jáne basqa da máseleler boıynsha olardyń usynystary tyńdaldy», - dedi ol.
