Ata Zańymyzdyń, Til týraly zańnyń talaptary qashan oryndalady? - depýtat R. Halmuradov
ASTANA. Naýryzdyń 10-y. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda depýtat Rozaqul Halmuradov Úkimet basshysynyń atyna saýal joldap, onda memlekettik til máselesine qatysty birqatar suraqtardy alǵa tartty,
dep habarlaıdy QazAqparat.
«Elbasynyń 2001 jylǵy aqpannyń 7-sindegi Jarlyǵymen bekitilgen Tilderdi qoldaný men damytýdyń 2001 - 2010 jyldarǵa arnalǵan memlekettik baǵdarlamasyna sáıkes 2010 jylǵy qańtardyń 1-inen bastap barlyq deńgeıdegi memlekettik organdar is qaǵazdardy memlekettik tilde júrgizýge kóshti. Degenmen, is júzinde is qaǵazdar burynǵydaı orys tilinde daıyndalady, sodan soń aýdarmashynyń kómegimen qazaqshaǵa aýdarylady, abzalynda kerisinshe bolýǵa tıis edi. Ata Zańymyzdyń, Til týraly zańnyń osy talaptary qashan oryndalady?», dedi depýtat.
Onyń aıtýynsha, atalǵan máseleni sheshý úshin ákimshilik reforma baǵdarlamasy aıasynda aýmaqtardan aýyldyq, aýdandyq, qalalyq, oblystyq memlekettik organdardyń apparattarynda qyzmet istep júrgen qazaq tilinde is-qaǵazdar daıyndaýdy jaqsy biletin mamandardy mınıstrlikter men vedomstvolardyń apparattaryna aýystyrý qarastyrylǵan bolatyn. Tipti osy maqsatta respýblıkalyq bıýdjet esebinen Astanada 1000 oryndyq jataqhana da salý qarastyrylǵan. «2010 jylǵa arnalǵan respýblıkalyq bıýdjette jataqhanany paıdalaný shyǵyndary úshin qarjy da qarastyryldy. Al, osy joba júıeli túrde iske asty ma? Nátıje qandaı? Qaısy mınıstrlikterdiń apparatyna, Úkimet Keńsesine qazaq tiline qatysty qansha maman aýystyryldy?», deıdi óz saýalynda R. Halmuradov.
