Ata zańymyz eldigimizdiń myzǵymas berik dińgegine aınaldy - BQO sotynyń tóraǵasy
Onyń aıtýynsha, Ata zańda sot táýelsizdigin qamtamasyz etip, sýdıalardyń mártebesin kóterýge zor múmkindikter jasaldy. Konstıtýtsııalyq normalar aıasynda memlekettik bıliktiń bir tarmaǵy retinde berik qalyptasqan elimizdiń sot júıesi halyqaralyq standarttarǵa saı laıyqty damý ústinde.
Táýelsizdiktiń alǵashqy jyldarynan bastap-aq zań ústemdigin, adamnyń negizgi quqyqtary men bostandyqtaryn qamtamasyz etýge baǵyttalǵan quqyqtyq memleket qurýdy maqsat etken Elbasymyz Nursultan Nazarbaev sýdıalardyń ótken altynshy sezinde Konstıtýtsııanyń senimdi kepili retinde Joǵarǵy sotqa qazaqstandyq sot tóreliginiń modelin odan ári jetildirýdi, barynsha kemeldengen táýelsiz sot júıesin qurýdy, azamattardyń sottarǵa degen senimin arttyra túsýdi mindettedi. Memleket sot júıesiniń materıaldyq-tehnıkalyq jaı-kúıine kóńil bólýde. Sýdıalar qaýymdastyǵy men sot qyzmetkerleri Elbasy men memleketimiz tarapynan kórsetilip otyrǵan osynaý zor senimdi aqtap, táýelsiz Qazaqstannyń damýy men gúldenýi jolynda aldaryna qoıylǵan mindetterdi abyroımen júzege asyrýy tıis.
Qazaqstannyń Ata zańy - Elbasynyń «Qazaqstan joly - 2050: bir maqsat, bir múdde, bir bolashaq» atty bıylǵy Joldaýynda pash etilgen «Máńgilik el» ulttyq ıdeıasynyń túpqazyǵy jáne qozǵaýshy kúshi. Memleket basshysynyń atap kórsetkenindeı, «Basty maqsat - Qazaqstannyń eń damyǵan 30 memlekettiń qataryna qosylýy». «Beıbitshilik pen turaqtylyq, ádil sot jáne tıimdi quqyq tártibi degenimiz - damyǵan eldiń negizi» delingen Joldaýda.
«Shuǵylaly Ata zań aıasynda órkenıet kóshine qosylyp, qaryshty damyp kele jatqan táýelsiz memleketimizdiń aıbyny asqaqtap, halqymyzdyń ál-aýhaty men turmysy gúldene berýi jolynda bir jeńnen qol, bir jaǵadan bas shyǵaryp, tatýlyqpen jáne birlikpen eńbek eteıik!», dedi B.Ámetov.
BQO sotynyń baspasóz qyzmetinen túsken málimetke qaraǵanda, árbir mereke jańalyǵy men jaqsylyǵyn ala keledi. Zamanyna jarasa damyp kele jatqan elimizdiń sot júıesi jańa kadrlarmen de tolyǵý ústinde. Merekelik shara barysynda jas maman saltanatty túrde ant qabyldady.
Munan keıin sot júıesiniń ardagerleri Qýanysh Ábýov, Qalıma Ótesheva qutyqtaý sóz sóıledi.
Qyzmette tabysqa jetkeni jáne belsendi qoǵamdyq qyzmeti úshin birqatar sýdıalar men sot qyzmetkerlerine merekelik marapattaýlar tabys etildi. Atap aıtqanda, Qazaqstan Respýblıkasy Joǵarǵy sotynyń tóraǵasy Q.Mámıdiń 2014 jylǵy 14 tamyzdaǵy №171 ókimimen uzaq jyldar boıǵy jemisti, ári minsiz qyzmeti, sot-quqyqtyq júıesin damytýǵa qosqan salmaqty úlesi úshin Batys Qazaqstan oblystyq sotynyń sýdıasy Habıbolla Amanqulov pen Batys Qazaqstan oblysy mamandandyrylǵan aýdanaralyq ekonomıkalyq sotynyń sýdıasy Lázzat Ustaǵalıeva Qazaqstan Respýblıkasy Joǵarǵy Sotynyń ІІІ dárejeli «Minsiz qyzmeti úshin» medalimen marapattalsa, Oral qalalyq №2 sotynyń sýdıasy Sáýle Jumabekova QR Joǵarǵy Sotynyń ІІ dárejeli «Sot júıesiniń úzdigi» tósbelgisin óńirine taqty. Al sot júıesiniń ardageri Lıýbov Kartashova sot júıesinde uzaq jyldar boıy qaltqysyz qyzmet etkeni, sot tóreligin atqarýdaǵy tabystary, belsendi qoǵamdyq qyzmeti úshin «Sýdıalar odaǵynyń qurmetti múshesi» qurmet belgisine ıe boldy.
Batys Qazaqstan oblystyq sotynyń sýdıalary Esenbaı Boranbaev pen Gúlnár Mınıýske jáne Oral qalasy mamandandyrylǵan aýdanaralyq ákimshilik sotynyń sýdıasy Aınur Qadyrovaǵa Sýdıalar qaýymdastyǵyndaǵy belsendi qyzmeti úshin Qazaqstan Respýblıkasy Sýdıalar odaǵynyń tóraǵasy S.Baıbatyrovtyń alǵysy jarııalandy. Bir top sýdıalar men sot qyzmetkerleri oblystyq sot tóraǵasynyń qurmet gramotasymen marapattaldy. Sonymen qatar ardagerlerge sýdıalar qaýymdastyǵynyń merekelik syılyqtary tabys etildi.
Jıyn sońynda merekelik saltanatqa qatysýshylar sot kórkemónerpazdarynyń kúshimen ázirlengen kontsertti tamashalady.