Ata Zańnyń óziniń joǵary mártebesi bar - senator Bektas Beknazarov
«Bıyl Qazaqstan halqy Ata Zańymyzdyń 20 jyldyǵyn atap ótýde. Osy 20 jyldyń ishindegi tarıhymyzǵa zer salatyn bolsaq, 1995 jyly búkilhalyqtyq referendýmda qabyldanǵan qazirgi Ata Zańymyz barlyq máselelerdi eskerip, bıliktiń úsh tarmaǵyna, ıaǵnı atqarýshy bılik, zań shyǵarýshy bılik jáne sot bıliginiń árqaısysynyń qyzmetin anyqtap, bekitti. Konstıtýtsııamyzdyń bizdegi memlekettik basqarý ınstıtýtyn, qoǵamdaǵy turaqtylyqty, sondaı-aq jalpy memleket retinde qalyptasýymyzdyń barlyq alǵysharttaryn durys aıqyndaýy arqasynda Qazaqstan órkendeýdiń dańǵyl jolynda»,-dedi depýtat.
Osy aptada Astanadaǵy Táýelsizdik saraıynda Qazaqstan Respýblıkasy Ata Zańynyń 20 jyldyǵyna arnalǵan «Konstıtýtsııa: birlik, turaqtylyq, órkendeý» taqyrybynda halyqaralyq ǵylymı-tájirıbelik konferentsııa ótkenin eske salyp ótken senator, «ıaǵnı osy sharadaǵy kóterilgen eń basty taqyryp - ol birlik, turaqtylyq jáne órkendeý. Qazaqta : "Betege ketse bel qalady, bekter ketse el qalady, berekeń ketse neń qalady?!" degen sóz bar. Bizdiń halyq osyny umytpaý kerek. Qazirgi birlik pen turaqtylyq elimizdiń berekesi. Osy berekeni qalyptastyryp otyrǵan, memlekettik ınstıtýttardyń bárin árqaısysyn júıe-júıemen bekitip otyrǵan, ár azamat óziniń erkin, quqyǵy men bostandyǵyn, órleýin sezinip otyrǵan jaǵdaıdy bizdiń qazirgi Ata Zańymyz qalyptastyrýda. Basqa zańdardyń barlyǵy Konstıtýtsııamyzdan bastaý alady jáne áleýeti óte zor. Aldyńǵy qatarly damyǵan quqyqtyq áleýmettik memleketterdiń Konstıtýtsııalarymen salystyrǵanda orny erekshe bıik, óziniń joǵary mártebesi bar»,-dedi B. Beknazarov.
Depýtat barsha Qazaqstan halqyn Ata Zań kúnimen quttyqtap, elimizdiń birligi men turaqtylyǵy baıandy bolýyn tiledi.