Ata zańnyń qabyldanýymen sot bıliginiń táýelsizdigi de birge jarııalandy - B. Beknazarov
ASTANA. 27 tamyz. QazAqparat - Ata zańnyń qabyldanýymen sot bıliginiń táýelsizdigi de birge jarııalandy.
Búgin QR Joǵarǵy Sotynda Qazaqstan Respýblıkasy Konstıtýtsııasy kúni merekesine arnalǵan saltanatty jıyn barysynda sóz sóılegen QR Joǵarǵy Sotynyń tóraǵasy Bektas Beknazarov osylaı málim etti.
«Ata Zańda barsha qazaqstandyqtar úshin ortaq qundylyqtar anyq aıshyqtalǵan. Bul - 140 etnos pen 46 din qaýymdastyqtary beıbitshilik pen kelisim arqasynda tatý ómir keship otyrǵan kıeli qazaq jeriniń tutastyǵy, oǵan qolsuǵylmaýshylyq. Bul - jynysyna, násiline, ulty men dinine, tiline jáne basqa da erekshelikterine qaraı azamattardy kemsitýge qatań tyıym salý. Dál osynaý negizden konstıtýtsııanyń basty qaǵıdattary - beıbitshilik pen turaqtylyq, barsha halyqtyń ıgiligi men ekonomıkalyq ósim qamtamasyz etilip keledi», - dep atap ótti Joǵarǵy Sot tóraǵasy Bektas Beknazarov.
Sonymen qatar, tóraǵa demokratııa qundylyqtarynyń negizgi máni bolyp sanalatyn ádildik, adam quqy men azamattardyń bostandyǵyn qamtamasyz etýdegi sot bıliginiń róli joǵary ekendigin atap ótti. «Sondyqtan da, Konstıtýtsııa qabyldanǵannan bastap sot bıliginiń táýelsizdigi jarııalandy jáne sot-quqyqtyq salasynyń reformasyna bastaý jasaldy. Sot salasyn táýelsizdiktiń 20 jyldyǵy boıynda reformalaý tek bir ǵana maqsatqa qol jetkizýge baǵyttaldy. Bul eń aldymen ádil sot tóreligine degen qoljetimdilik», - dedi tóraǵa.
