Ata zańnyń Úkimet týraly bólimi de ózgeriske ushyraıdy — Konstıtýtsııalyq komıssııa

ASTANA. KAZINFORM — Konstıtýtsııalyq reforma jónindegi komıssııanyń kezekti otyrysynda Konstıtýtsııalyq sot tóraǵasynyń orynbasary Baqyt Nurmuhanov bir palataly Parlamentke kóshý Ata zańǵa qandaı ózgerister engizýdi talap etetinin baıandady. 

 — Bir palataly Parlament modeline kóshý aıasynda Quryltaı degen bólimge aýqymdy túzetýlerdiń jobasy daıyndaldy. Bólimnen qos palataly Parlamentke jáne bul júıedegi onyń qyzmetine baılanysty erejeler alyp tastaldy. Zań shyǵarý organynyń ókilettikterine tereń taldaý júrgizildi. Quryltaıdyń sessııalaryna jáne onyń qyzmetin uıymdastyrýǵa qatysty baptardyń bári derlik jańardy. Zań shyǵarý bastamasyna ıe sýbektilerdiń qatary artty. Quryltaı zań qabyldaý arqyly retteletin asa mańyzdy qoǵamdyq qatynastardyń tizbesi keńeıdi, — dedi ol.

Konstıtýtsııalyq sot ókili zań jobalaryn qaraý men qabyldaýdyń rásimderi de qaıta pysyqtalǵanyn atap ótti.

— Quryltaı tóraǵasynyń laýazymyna qatysty máseleler jeke bapta retteldi. Kez kelgen elde Parlament pen Úkimet ózara tyǵyz árekettesip, qyzmet atqarady. Sondyqtan bir palataly Quryltaıǵa kóshý Úkimet bólimine de birqatar túzetý engizýdi talap etedi. Osy oraıda bólimniń de birneshe babynyń erejeleri naqtylanyp otyr, — dedi Baqyt Nurmuhanov.

Jalpy Konstıtýtsııalyq komıssııa otyrysynda partııalar qandaı usynys aıtqanyn myna silteme arqyly oqýǵa bolady.