Ata zańnyń Prıambýlasyn jańǵyrtý qasterli qujatty ómirsheń ete túsedi – Májilis depýtaty
ASTANA. KAZINFORM – Ata zańnyń Prıambýlasyn jańǵyrtý, mazmunyn jetildirý osy qasterli qujatty ómirsheń ete túsedi. Bul týraly Konstıtýtsııalyq reformalar jónindegi komıssııanyń otyrysynda Májilis depýtaty Baqtyǵoja Іzmuhambetov aıtty.
- El bolashaǵy úshin aıryqsha mańyzǵa ıe konstıtýtsııalyq reformany búkil jurt bolyp pysyqtap jatyrmyz. Birinshi kezekte Ata zańnyń Prıambýlasyn jańǵyrtý, mazmunyn jetildirý osy qasterli qujatty ómirsheń ete túsedi. Prıambýla mátininde kórinis tabýy tıis usynystardyń ishinde bolashaq urpaq aldyndaǵy jaýapkershilik pen onyń múddesi týraly arnaıy norma qarastyrylǵan. Bul bir aýyz sóz keler urpaqtyń qýanyshy men qyzyǵyna, murat-maqsatyna tikeleı qatysty. Eldik múddeni kózdegen ultqa qyzmet etý qaǵıdasy eń áýeli keleshektiń qamy úshin jasalady. Óskeleń urpaq aldyna árbir azamattyń, qoǵam men memlekettiń atqaryp ketýi tıis óz jaýapkershiligi bar. Erteńgi kúnge qalǵan júk urpaqqa aýyrtalyp qana ákeletini belgili. Demek, qoǵam uǵymy siz ben bizge ǵana emes, ol keleshek urpaqty da qamtıdy, - dedi depýtat.
Sondyqtan onyń paıymynsha, memleket damýdyń uzaqmerzimdi, keshendi josparyn ázirlegende osy qundylyqtar men ult múddesin jan-jaqty basshylyqqa alýǵa tıis.
- Bolashaq urpaq aldyndaǵy jaýapkershilik memlekettik saıasattyń negizgi tirek qaǵıdattarynyń biri. Bul qaǵıdat ekologııalyq saıasatty qalyptastyrýda, bıýdjettik josparlaýda, tabıǵı resýrstardy utymdy ári únemdi paıdalanýda, ulttyq baılyqty saqtaýda basty baǵdar bolýy qajet. Bul ustanym memlekettik basqarýdyń kóz aldaǵy múddeler emes, eldiń turaqty ári ornyqty damýyna baǵyttalýyn qamtamasyz etedi. Sondaı-aq ol memlekettiń áleýmettik jaýapkershiligi men qorshaǵan ortany qorǵaý mindetimen jáne ulttyq qaýipsizdikti nyǵaıtý maqsatymen ózara tyǵyz baılanysty. Sondyqtan bul normany bekitý jaı deklaratıvti ustanym emes, memlekettik saıasattyń naqty strategııalyq baǵytyn aıqyndaıtyn mańyzdy qaǵıda bolýǵa tıis, - dedi Baqtyqoja Іzmuhambetov.
Buǵan deıin E.Bóketov atyndaǵy Qaraǵandy ýnıversıtetiniń rektory Nurlan Dýlatbekov jańartylatyn Konstıtýtsııanyń kirispesindegi ózgeshelikterdi tárbıe quraly retinde baǵalady.