Ata Zańymyzda birlik pen kelisimniń negizderi nyǵaıa túsedi — Toqaev

ASTANA. KAZINFORM — Bas qujatta jaýapty ári jasampaz otanshyldyq uǵymy naqty jazylady. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

— Ádiletti Qazaqstan, Zań men tártip, azamattardyń quqyqtary men bostandyqtary múltiksiz saqtalatyny sııaqty negizgi qaǵıdattar naqty kórsetilgen. Bilim, ǵylym, ınnovatsııalar jáne mádenıet elimizdiń teńdessiz basymdyqtary retinde aıqyndaldy. Táýelsizdigimiz, egemendigimiz jáne aýmaqtyq tutastyǵymyz myzǵymas qundylyqtar bolyp qala beredi jáne elimizdiń ýnıtarlyǵy, jeriniń tutastyǵy men basqarý nysany eshqashan ózgermeıdi degen asa mańyzdy sózder bar. Ata Zańymyzda birlik pen kelisimniń negizderi nyǵaıa túsedi, — dedi Qasym-Jomart Toqaev.

Osy oraıda Prezıdent Bas qujatta jaýapty ári jasampaz otanshyldyq uǵymy naqty jazylatynyn atap ótti.

— Bir sózben aıtqanda, jańa Konstıtýtsııa jobasyn shyn máninde ozyq, ıaǵnı túbegeıli jańarǵan, árbir tusy saraptalǵan, sapaly jazylǵan mátin dep ataýǵa tolyq negiz bar. Onda konstıtýtsııalyq qurylysqa qatysty álemdegi úzdik tájirıbeler kórinis tapqan, adam quqyqtary jáne ulttyq múddemiz tolyq qorǵalǵan, — dedi Memleket basshysy.

Osyǵan deıin Prezıdent Konstıtýtsııa jobasyn sot sheshiminsiz «turǵyn úıden májbúrlep shyǵarýǵa» da jol berilmeıdi dep tolyqtyrǵan jón ekenin aıtty.