Ata Zańǵa túzetý engizý tek jalpyhalyqtyq referendým arqyly júzege asady – Konstıtýtsııalyq komıssııa
ASTANA. KAZINFORM – Jańa Konstıtýtsııanyń jobasynda jalpyhalyqtyq referendým ótkizý týraly Prezıdentke usynys engizetin sýbektilerdiń qataryna qosymsha Qazaqstan Halyq Keńesin qosýdy kózdeıtin norma qarastyryldy. Bul týraly Konstıtýtsııalyq reformalar jónindegi komıssııanyń otyrysynda Konstıtýtsııalyq Sot tóraǵasynyń orynbasary Baqyt Nurmuhanov málim etti.
– Onynshy bólim Konstıtýtsııaǵa ózgerister men tolyqtyrýlar engizýge tártibine arnalady. Respýblıka Prezıdenti Qasym-Jomart Toqaev Konstıtýtsııaǵa kez kelgen túzetý tek referendým arqyly engizilýi qajettigin aıtty. Osy oraıda jobada Ata Zańǵa túzetýler engizý Prezıdenttiń sheshimi boıynsha tek jalpyhalyqtyq referendým arqyly júzege asýy múmkin, dep bekitildi. Parlament arqyly túzetýler engizý múmkindigi alynyp tastaldy. Bul másele boıynsha jalpyhalyqtyq referendým ótkizý týraly Prezıdentke usynys engizetin sýbektilerdiń qataryna qosymsha Qazaqstan Halyq Keńesin qosýdy kózdeıtin norma qarastyryldy, - dedi Baqyt Nurmuhanov jańa Konstıtýtsııanyń jobasyn tanystyrý kezinde.
Onyń aıtýynsha, on birinshi bólim «Qorytyndy jáne ótpeli erejelerge» arnalyp otyr. Onda jańa Konstıtýtsııany qoldanysqa engizý merzimi, osy ýaqytqa deıin qabyldanǵan zańdar men ózge normatıvtik-quqyqtyq aktilerdiń qoldanylý tártibi anyqtaldy. Úkimettiń, ortalyq jáne jergilikti memlekettik organdardyń normatıvtik-quqyqtyq aktilerdi jańa Konstıtýtsııaǵa sáıkestendirý maqsatynda qajetti sharalar qabyldaý mindeti qarastyryldy.
– Sonymen qatar jańa Konstıtýtsııa qabyldanǵan jaǵdaıda, osyǵan deıin qoldanystaǵy Ata Zańnyń negizinde qabyldanǵan Konstıtýtsııalyq Keńes pen Konstıtýtsııalyq Sottyń normatıvtik qaýlylary ózderiniń zańdyq kúshin saqtaıtyny jazyldy. Ol úshin bul normatıvtik qaýlylar jańa konstıtýtsııalyq talaptarǵa qaıshy kelmeýi qajet, - dedi Konstıtýtsııalyq Sot tóraǵasynyń orynbasary.
Budan buryn habarlanǵandaı, jańa Konstıtýtsııanyń jobasyndaǵy úshinshi «Prezıdent» bólimine tujyrymdamalyq turǵydan qaıta qaralǵan jáne múlde jańa erejeler endi.
Sonymen qatar Quryltaı tóraǵasynyń laýazymyna qatysty máseleler jeke bapta retteldi.