ATA ZAŃǴA 20 JYL: Oralda ardagerler arasynda ashyq týrnır márege jetti
Batys Qazaqstan voleıbol federatsııasy uıymdastyrǵan jarysqa barlyǵy on komanda qatysyp, eki kún boıy baq synady.
Týrnırdiń ashylý rásiminde oblys ákiminiń birinshi orynbasary, oblystyq voleıbol federatsııasynyń prezıdenti Arman Óteǵulovtyń atap ótkenindeı, Elbasy tapsyrmasyna sáıkes elimizde jas erekshelikterine qaramastan, qalyń buqaranyń sportpen jappaı aınalysýyna basa mán berilip keledi. Sonyń ishinde voleıbol oıyny keń taralýda. Buǵan dálel retinde osy jarystyń ózine jeti birdeı aýdannan quramalardyń kelgenin aıtýǵa bolady. Komandalardyń quramynda muǵalimder men dárigerler, memlekettik organdar men bank qyzmetkerleri, ıaǵnı túrli mamandyq ıeleri oınady.
Áýeli komandalar úsh topqa bólindi. Olardyń arasynan BQO voleıbol federatsııasy («Oral»), Bókeı ordasy, Qaztalov jáne «BQATÝ» komandalary sýyrylyp shyǵyp, jartylaı fınalǵa joldama aldy. Quramynda Nurbolat Bısekenov, Erbolat Tańatov, Bolat Badashev, Nurbolat Maǵzomov syndy oıynshylary bar bókeıordalyqtar 2:0 esebimen qaztalovtyqtardy utyp, fınalǵa joldama aldy. Fınalda oblys quramasy bolyp esepteletin «Oral» komandasyna jol bergenimen, osynyń ózin úlken jetistik deýge bolady. Úshinshi oryn úshin básekede «BQATÝ» komandasynyń mereıi ústem boldy. Jekelegen oıynshylardan Pavel Ageev («Oral») - úzdik shabýylshy, Pavel Shepelev («Oral») - týrnır aqsaqaly, Valerıı Meh («BQATÝ») - úzdik qorǵaýshy, Súıinbek Haırollın (Bókeı ordasy) - úzdik tosqaýyl qoıýshy, Jaqyp Kárimov (Qaztalov) úzdik baılanystyrýshy atandy.
BQO voleıbol federatsııasy dırektorynyń mindetin atqarýshy Temirhan Eleýbaevtyń aıtýynsha, bul jarys Shymkent qalasynda Ata zańnyń 20 jyldyǵyna oraı 55 jastan joǵary voleıbolshylar arasynda ótetin respýblıkalyq týrnırge irikteý saıysy bolyp tabylady. Týrnır qorytyndysyna sáıkes BQO quramasy jasaqtalmaq.