Ata Zańdaǵy jańa qundylyqtar bitimgerlik saıasattyń negizi bolmaq — sarapshy

ASTANA. KAZINFORM — Búgingi jahandyq teketires pen álemdik tártiptiń ózgerý kezeńinde Qazaqstan óziniń beıbitsúıgish baǵytyn Konstıtýtsııalyq deńgeıde aıqyndamaq. 

Bul týraly L. N. Gýmılev atyndaǵy EUÝ professory, zań ǵylymdarynyń doktory Jamaladen Ibragımov «Referendým-2026» onlaın marafonynda málimdedi.

Professor Ibragımovtyń aıtýynsha, Qazaqstan búginde halyqaralyq qatynastarda «Middle Power» retinde óz ornyn nyq aıqyndap úlgerdi. Memleket basshysy júrgizip otyrǵan jumsaq dıplomatııa saıasaty elimizdi tek óńirlik emes, jahandyq deńgeıdegi salmaqty oıynshyǵa aınaldyrdy.

— Preambýlada belgilengen qundylyqtar bizdiń memlekettiń álemdik keńistiktegi beıbitsúıgish rólin nyǵaıta túsedi. Bul — Qazaqstannyń halyqaralyq quqyqtaǵy tuǵyrnamasyn bekitetin úlken quqyqtyq prıntsıp. Biz kez kelgen quqyqtyq daý-máseleni tek qana beıbit jolmen sheshetinimizdi búkil álemge pash etemiz, — dep atap ótti ǵalym.

Professor halyqaralyq tájirıbege toqtala kele, Qazaqstannyń bitimgerlik áleýetin bylaısha sabaqtady.

— Bizdiń memlekettiń halyqaralyq mindettemeleri men ustanymy keshegi «Ibrahım kelisimi» sekildi álemdi tańqaldyrǵan bastamalarmen úndes. Mundaı qadamdar musylman elderi men basqa da taraptar arasynda beıbitshilik ornatýdy kózdeıdi. Jańa Konstıtýtsııa osy baǵyttaǵy jumystardyń quqyqtyq tetigine aınalady, — dep túıindedi ol.

Aıta keteıik, Jańa Konstıtýtsııa jobasy Qazaqstannyń beıbitshilik tujyrymdamasyn aıqyndaıtyny jaıly zańgerdiń pikirin jazǵan edik.