Ata zańda aıqyndalǵan qaǵıdattar ár balaǵa birdeı múmkindik berýi tıis - Bektenov
ASTANA. KAZINFORM – Óskeleń urpaq tárbıesinde mektep pen otbasynyń birlesken jumysy mańyzdy. Bul týraly Úkimet otyrysynda Premer-mınıstr Oljas Bektenov málim etti.
- Jańa Konstıtýtsııada eńbeksúıgishtik, progress jáne bilim qundylyqtary negizgi qaǵıdattar retinde bekitilgen. Ásirese, bilim men adam kapıtalyn damytýǵa aıryqsha mán berilip otyr. Ata zańymyzda aıqyndalǵan qaǵıdattar oqytý sapasy men óskeleń urpaq tárbıesinen naqty kórinis taýyp, ár balaǵa birdeı múmkindik berýge tıis. Sondyqtan bizdiń mindetimiz – jańa oqý jylyn durys uıymdastyryp qana qoımaı, balalardyń sapaly bilim alýy men jan-jaqty damýyna qajetti jaǵdaı jasaý. Memleket basshysy balalar men jastardyń boıynda jańa Konstıtýtsııada bekitilgen quqyqtyq mádenıet pen azamattyq jaýapkershilikti qalyptastyrýǵa, «Zań men Tártip» qaǵıdatynyń saqtalýyna basa nazar aýdaryp keledi, - dedi O.Bektenov.
Onyń aıtýynsha, jalpy alǵanda, tárbıe jumysy «Adal azamat» biryńǵaı baǵdarlamasyna jáne «Taza Qazaqstan» jalpyulttyq bastamasyna negizdelýge tıis. Onyń aıasynda ekologııalyq mádenıet pen qorshaǵan ortaǵa qamqorlyq sııaqty ómirlik ustanymdardy ornyqtyrýǵa nazar aýdarý kerek.
- Bul iste mektep pen otbasynyń birlesken jumysy mańyzdy. Árbir tárbıe sharasy naqty nátıje berýi qajet, - dedi Úkimet basshysy.
Buǵan deıin habarlanǵandaı, bıyl 1-synypqa 380 myńnan astam bala qabyldanady.
