Ata Zań jańa qoǵamdyq ádeptiń negizin qalyptastyrady — Qarın

ASTANA. KAZINFORM — Memlekettik keńesshi Erlan Qarın Jańa Konstıtýtsııany qabyldaý jańa, zamanaýı ári serpindi memlekettik-saıası modelge kóshkenimizdi bildiredi degen pikir aıtty.

— Jańa Konstıtýtsııany qabyldaý jańa, zamanaýı ári serpindi memlekettik-saıası modelge kóshkenimizdi bildiredi. Daýys berý nátıjeleri bizdiń qoǵamnyń prezıdenttik reformalardyń tóńiregine toptasyp, tutasa túsetinin rastady.

Alaıda, Ata Zańdy qabyldaý — alǵashqy kezeń ǵana. Memleket basshysy aıtqandaı, aldymyzda zańnamalyq bazany úılesimdi etý boıynsha aýqymdy jumys kútip tur, — dep jazdy Memlekettik keńesshi.

Ol jańadan 5 konstıtýtsııalyq zańdy jáne shamamen 60 kodeks pen zańdy qabyldaý qajet ekenin aıtty.

— Alǵashqy kezeńniń ózinde jańadan 5 konstıtýtsııalyq zańdy jáne shamamen 60 kodeks pen zańdy qabyldaý qajet. Odan keıin Quryltaı jáne Qazaqstan Halyq Keńesi sekildi jańa ınstıtýttardy qalyptastyrý mindeti tur.

Úshinshi, eń basty mindet — jańa konstıtýtsııalyq qaǵıdattar men qundylyqtardy qoǵamdyq sanada ornyqtyrý boıynsha júıeli jumys júrgizý. Bul degenimiz, eń aldymen, Táýelsizdik jáne Egemendik, Ádiletti Qazaqstan ıdeıasy, Zań jáne Tártip qaǵıdattary, birlik jáne yntymaq, ultaralyq jáne konfessııaaralyq kelisim, adamı kapıtaldy damytý, mádenıet, bilim, ǵylym jáne ınnovatsııa qundylyqtary, eńbekqorlyq, progress, tabıǵatqa degen qamqorlyq.

Osylaısha, Ata Zańnyń qabyldanýymen konstıtýtsııalyq, ınstıtýtsıonaldyq jáne ıdeologııalyq deńgeılerde jańa qoǵamdyq ádeptiń birtutas maǵynalyq negizi qalyptasady, — dedi Qarın.

Aıta ketelik Qazaqstan Respýblıkasynyń jańa Konstıtýtsııasynyń mátini jarııalanǵan edi.