Londondaǵy Koventrı-strıt Ramazanǵa oraı tórtinshi ret bezendirildi

ASTANA. KAZINFORM — London ortalyǵyndaǵy áıgili Koventrı-strıt qasıetti Ramazan aıyna oraı tórtinshi jyl qatarynan arnaıy jaryq shamdarymen bezendirildi, dep habarlaıdy Anadoly.

Kóshe Ulybrıtanııa astanasynyń sımvoldarynyń biri — Pıkadıllı-Serkýs alańynan Lester-skver alańyna deıin sozylyp jatyr. Bıyl da merekelik jaryq ınstallıatsııasy ornatylyp, «Qaıyrly Ramazan!» degen jazý jarqyrap tur.

Bezendirý jumystary Aziz Foundation qory men London mýnıtsıpalıtetiniń yntymaqtastyǵymen júzege asty.

Shamdardy jaǵý rásimine London meri Sadık Han jáne qor ókili Rahıma Azız qatysty. Merdiń aıtýynsha, tórt jyl buryn London Batys áleminde Ramazan shamdarymen bezendirilgen alǵashqy qala atandy.

Sadık Han Ramazan aıy túrli din ókilderin bir ortaǵa toǵystyratyn kezeń ekenin atap ótti.

Merekelik jaryq 19 naýryzǵa deıin janyp turady. Bezendirýge shamamen 31 myń jaryqdıodty sham qoldanylǵan. Olar kún saıyn saǵat 17:00-den 01:00-ge deıin qosylady.

Aıta keteıik, Koventrı-strıt alǵash ret Ramazanǵa oraı 2023 jyly bezendirilgen bolatyn.

Bıyl Ramazan aıy 19 aqpanda bastalady. Osyǵan oraı Qazaqstan musylmandary dinı basqarmasy elimizdiń qalalary men aýyldaryna arnalǵan Ramazan aıynyń oraza kestesin jarııalady.

Osydan buryn túrkııalyq qor Ramazan aıynda 66 eldegi 3 mıllıon adamǵa kómek kórsetetini anyqtaldy.