Ata zań qoǵamymyzdyń ilgerileýi men jetilýiniń odan arǵy jolyn aıqyndap berdi - B. Beknazarov
ASTANA. 27 tamyz. QazAqparat - Búgin QR Joǵarǵy Sotynda Qazaqstan Respýblıkasynyń Konstıtýtsııasy kúni merekesine arnalǵan saltanatty jıyn bolyp ótti.
Sharaǵa QR Joǵarǵy Sotynyń Tóraǵasy Bektas Beknazarov, Joǵarǵy sot sýdıalary, Qazaqstan sýdıalar odaǵynyń músheleri, sondaı-aq sot júıesi qyzmetkerleri men Joǵarǵy Sot ardagerleri qatysty.
Jıyndy ashyp sóz sóılegen Joǵarǵy Sot tóraǵasy Bektas Beknazarov qatysýshylardy memlekettik merekemen quttyqtaı kele, Ata zańnyń qazaqstandyqtar ómirindegi alatyn ornyna da toqtalyp ótti. «Osydan 17 jyl buryn, 1995 jyldyń 30 tamyzynda memlekettilik tarıhymyzdyń alǵashqy jyldarynda jalpyhalyqtyq referendým jolymen halyqtyń ózi ótken babalarymyzdyń jolyn, búgingi hám keleshek urpaqtyń aldyndaǵy zor jaýapkershiligin tereń túsine otyryp táýelsiz Qazaqstannyń eń Joǵarǵy zańyn qabyldady. Mine, osyndaı qadam, halqymyzdyń erik-jigerin kórsetken osynaý taǵdyrsheshti qujat bizdiń qoǵamymyzdyń ilgerileýi men jetilýiniń odan arǵy jolyn aıqyndap berdi», - dedi B. Beknazarov. Joǵarǵy Sot tóraǵasynyń aıtýynsha, Qazaqstannyń ótken jyldardaǵy tutastaı jetistigi - bul Ata zań negizinde qalyptasqan zańdardyń nátıjesi.
Saltanatty shara barysynda Joǵarǵy sot sýdıalary, Qazaqstan sýdıalar odaǵy ortalyq keńesiniń músheleri jáne taǵy basqa qonaqtar sóz alyp, jyly lebizder bildirdi, Ata zańnyń qoǵamdaǵy ornyn aıshyqtap sóıledi. Jıyn sot salasyndaǵy qyzmetkerlerge nagradalar, qurmet gramotalaryn, alǵys hattaryn tabystaýmen jalǵasty. Atap aıtqanda, QR Joǵarǵy Sotynyń Tóraǵasy Bektas Beknazarovqa sot júıesindegi uzaq jyldarǵy kirshiksiz eńbegi, jetistigi jáne sot-quqyqtyq júıesin damytýǵa qosqan qomaqty úlesi úshin «Qurmetti sýdıa» ataǵy berildi. Budan bólek, «Qazaqstan Respýblıkasynyń táýelsizdigine 20 jyl» medalimen memlekettiń qurylýy men el táýelsizdigin nyǵaıtýǵa qosqan eleýli úlesteri úshin Joǵarǵy sot sýdıasy B. Jumaǵulov, QR Joǵarǵy soty janyndaǵy sot qyzmetterin qamtamasyz etý departamenti basshysynyń birinshi orynbasary J. Ábdıev, orynbasar A. Qasenova jáne basqalary marapattaldy.
Budan basqa «Sot júıesiniń ardageri» medaldary men «Úsh bı» qurmet belgileri de óz ıelerin tapty. Saltanatty jıyn sońy merekelik kontsertke ulasty.
