Ata-enesin óltirdi degen kúdikke ilingen atyraýlyq azamattyń 5 balasy memleket qamqorlyǵyna alyndy
ATYRAÝ. KAZINFORM – Atyraý oblysy Jangeldın aýylynda erli-zaıyptyny óltirdi degen kúdikke ilingen Sultan Sársemalıevtiń 5 balasy memlekettik mekemelerge ornalastyryldy.
2026 jyldyń 2 aqpanynda Mahambet aýdandyq ákimdigine oblystyq polıtsııa departamentinen shuǵyl shara qabyldaý jónindegi usynys hat kelip túsken. Hatta kúdiktiniń kámelet jasqa tolmaǵan 5 balasyn qaýipsiz jerge, ıaǵnı memlekettiń qorǵaýyna alý kerektigi jazylǵan.
– Mahambet aýdany ákimdigi janyndaǵy kámelet jasqa tolmaǵandardyń isteri jáne olardyń quqyqtaryn qorǵaý jónindegi komıssııanyń sheshimimen 3 balany oblystyq bilim berý basqarmasyna qarasty beıimdeý ortalyǵyna 1 jáne 3 jastaǵy eki kishkentaıdy densaýlyq saqtaý basqarmasyna qarasty sábıler úıine ornalastyryldy. Balalardyń jaǵdaıy baqylaýda. komıssııa otyrysyna balalardyń ata-ájesi qatysqan. Atasy sheshim zań aıasynda qabyldansa qarsy emestigin bildirse, ájesi balalardy ózi qaraı berýge daıyn ekenin aıtty, - dedi Mahambet aýdandyq bilim bóliminiń basshysy Venera Qabysheva.
Bólim bólimi basshysynyń sózinshe, balalar 2025 jyldyń aqpan aıynan bastap Mahambet aýylyndaǵy Ońaı Shonaev atyndaǵy mektepte bilim aldy. Olardy sabaqtan ata-ájesi, keıde anasy alyp ketetin bolǵan . 2 aqpan kúni tústen keıin 3, 1 synyp oqıtyn jáne 4 jastaǵy balany beıimdeý ortalyǵyna tapsyrǵan. Beıimdeý ortalyǵynyń basshysy Qundyz Ǵınaıatovanyń aıtýynsha, balalardyń psıhologııalyq jaǵdaıy bir qalypty.
– 9,7 jáne 4 jastaǵy bala keshe 15:20 shamasynda ortalyqqa ornalasty. Ata-ájesine berýge eshqandaı negiz bolmaǵandyqtan ata-ana qamqorlyǵynsyz qalyp otyr. Ata-anasy izdestirilýde dep aıtty. Balalardyń kóńil kúı jaqsy. Bilim alýda. Qaladaǵy №33 mektep muǵalimderi ishke kelip sabaq beredi. Olardy ata-ájeleri ár aptanyń jumasynda saǵat 17:00-19:00 aralyǵynda kezdesý ýaqytynda kóre alady, - dedi kámeletke tolmaǵandardy beıimdeý ortalyǵynyń basshysy Qundyz Ǵınaıatova.
Sol úıdiń eki kishkentaıy qazir sábıler úıinde. Densaýlyq saqtaý basqarmasy olardyń densaýlyq jaǵdaıy jaqsy ekenin málimdedi.
Aıta keteıik, kúdikti Sultan Sársemalıev pen Aqbaıan Muqanǵalıeva zańdy nekede emes.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń – otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary anyqtaldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Atyraý oblystyq PD Jangeldın aýylynda joǵalǵan otbasy músheleri Meıramgúl Qarabalına men Naýryz Muqanǵalıevty izdeý jumysyn jalǵastyryp jatyr.