Ata-babasyn ulyqtaýdy surap ujymdyq hat jazý ádetke aınalyp barady - Memleket basshysy
ASTANA. KAZINFORM - Sońǵy kezde ata-babasynyń, jerlesiniń esimin ulyqtaýdy surap, ujymdyq hat jazý ádetke aınalyp barady. Mundaı ustanymdar elimizdiń birtutas ıdeologııalyq keńistigine zııan keltiredi. Bul týraly Memleket basshysy Qasym-Jomart Toqaevtyń Ulttyq quryltaıdyń úshinshi otyrysyndaǵy sózinde aıtty, dep habarlaıdy Aqordanyń baspasóz qyzmeti.
«Árbir qazaq ata-babasyn qurmetteıdi, rýhyna taǵzym etedi. Sondyqtan, shejire bizdiń mádenı kodymyzdyń ajyramas bóligine aınalǵan. Biraq biz tek qana osy túsinikpen shektelip qalmaýymyz qajet. Eń bastysy, bul máseleni eshqashan saıasatpen aralastyrýǵa bolmaıdy.
Sońǵy kezde ata-babasynyń, jerlesiniń esimin ulyqtaýdy surap, ujymdyq hat jazý ádetke aınalyp barady. Atasyna eskertkish qoıýdy, kóshege atyn berýdi ótinetinder kóbeıdi. Bul — jaǵymsyz jaǵdaı. Mundaı ustanymdar elimizdiń birtutas ıdeologııalyq keńistigine zııan keltiredi. Urpaq tárbıesine kesirin tıgizedi. Tipti, shetelde bizdi kóne zamanǵa jáne keńestik kezeńge qatysty monýmentter qaptaǵan „Eskertkishter eli“ dep aıtatyn boldy», — dedi QR Prezıdenti.
Sondaı-aq, Memleket basshysy onomastıka salasynda belgili tarıhı tulǵalarmen qatar, jalpyulttyq qundylyqtar da nazardan tys qalmaýǵa tıis ekenin atap ótti.
«Táýelsizdik, Respýblıka, Birlik sııaqty memlekettiligimizdiń basty tuǵyry sanalatyn negizgi uǵymdarǵa basa mán berý kerek. Eldigimizdi saqtaımyz, myqty memleket bolamyz desek, osynyń bárin esten shyǵarmaǵan abzal.
«Shyn máninde, jeke múddesin emes, el múddesin bárinen bıik qoıatyn azamattar urpaqqa úlgi bolýy qajet. Ásirese, qazirgi geosaıası jaǵdaıda bul mindet asa mańyzdy ekenin umytpaǵan jón», — dedi Qasym-Jomart Toqaev.
Osy oraıda, Prezıdent áıgili qalamger, kórnekti memleket qaıratkeri Ábish Kekilbaevty aıryqsha atap ótti.
"Ol – rýhanııat salasynda, memlekettik qyzmette erekshe qoltańbasyn qaldyrǵan birtýar tulǵa, klassık jazýshy. Men Ábekeńmen qyzmettes boldym, jaqyn aralastym. Ábish Kekilbaıuly naǵyz taý tulǵaly azamat edi. Ol ishki mádenıeti óte joǵary jan bolatyn. Eshqashan bireýdi bireýge qarsy qoımaıtyn, bárine súıispenshilikpen qaraıtyn. Ár aımaqtan ózine sálem berýge kelgen azamattarǵa esigi qashanda aıqara ashyq edi. Onymen tildesken adamdar rýhtanyp, qanattanyp shyǵatyn. Ábekeń usaq-túıek áńgimege berilmeıtin, jalpy adamzatqa ortaq máseleler týraly oılanyp, tolǵanatyn. Bir sózben aıtsaq, Ábish Kekilbaev naǵyz zııaly adam, kemeńger tulǵa boldy.
Sondaı-aq búgin ortamyzda Quryltaı múshesi, asa kórnekti mádenıet qaıratkeri, Qazaqstannyń Eńbek Eri Іlııa Jaqanov otyr. Іlekeń de – naǵyz memleketshil tulǵa, zııaly qaýym ishindegi asa bedeldi aǵamyz. Árdaıym salmaqty oı, salıqaly pikirimen elge syıly bolyp júrgen ardaqty azamat.
Biz halqymyzdyń osyndaı perzentterin, olardyń ómir jolyn jan-jaqty dáripteýimiz kerek, laıyqty qurmet kórsetýimiz qajet», - dedi Memleket basshysy.
