Ata-babamyzdan kele jatqan yntymaq pen birlikti saqtaýymyz kerek -Saparbaev

Búgin «Birligimiz jarasqan» atty merekelik sherý ótti. Sherýge óndiris oryndarynyń jumysshylary, qurylysshylar men memlekettik qyzmetkerler, stýdentter, etnomádenı birlestik ókilderi shyqty. Barlyǵy 10 myń adam Aqtóbeniń bas dańǵylymen júrip ótip, «Qazaq halqyna myń alǵys» stellasyna jınaldy. Stella mańyndaǵy sahnada teatrlandyrylǵan ádebı-horeografııalyq kórinis ótedi. Kórinis «Týǵan jer», «Rýhanı jańǵyrý», «Astana-Máńgilik El», «Baqytty bala» kompozıtsııalarynan turdy. Óńir basshysy aqtóbelikterdi birlik kúnimen quttyqtady.

«Búgingi kún beıbitshiliktiń, dostyqtyń, yntymaqtyń merekesi. Memleket basshysy Nursultan Nazarbaev aıtqandaı, máńgilik eldiń altyn dińgegi birlik pen bereke. Ótken 27 jylda Qazaqstan kópultty memlekette birlik, dostyq, yntymaqtyń bar ekennin kórsetti. Sonyń arqasynda elde turaqtylyq bar, ekonomıka damyp, saıasatta da aldyńǵy qatarly oryndarǵa jetip otyrmyz. Qazaqstanda 130-ǵa jýyq ult ókili turady. Olardyń bári bir otbasynyń balasyndaı tatý-tátti ómir súrip keledi. Saıasatta, ekonomıkadaǵy jetken jetistiktiń negizi osynda. Elbasy Nursultan Nazarbaev «Elimizdegi birlikti, yntymaqty kózimizdiń qarashyǵyndaı saqtaýymyz kerek» dep aıtady. Biz memleketimizde turyp jatqan ár azamattyń ultyna, dinine qaramaı barlyq jaǵdaıyn jasaýymyz kerek. Árbir ulttyń ókili Qazaqstanda óz tarıhyn, saltyn, dástúrin, ónerin, tilin bilýi tıis. Qazaqstandaǵy etnomádenı ortalyq jumystarynyń basty maqsaty osy. Parlamenttegi 9 depýtat ult bolashaǵy, damýy úshin úlken jumys atqaryp, kómek jasaıdy»,- dedi oblys ákimi Berdibek Saparbaev.

Qazir Aqtóbe oblysynda 100-ge jýyq ózge ult ókili turady. Barlyǵy 18 etnomádenı ortalyq jumys istep tur. Qazaqstan halqy Assambleıasyna arnalǵan ǵımaratta jeksenbilik sabaqtar ótedi.

«Birlik, yntymaqtyń merekesine myńdaǵan adam jınaldy. Bul bir shańyraq astynda ómir súrip jatqan el ekenimizdi kórsetedi. Eger biz damyǵan 30 eldiń qataryna enemiz desek, ata-babamyzdan kele jatqan yntymaq pen birlikti saqtaýymyz kerek. Qandaı da bir qıyn zaman bolsa da, soǵys, asharshylyq, repressııa kezinde qazaqtar ózge ultty qasyna jınap, bir úzim nandy bólip jep, kómektesti, ómirin saqtaýyna múmkindik jasady. Sondyqtan dúnıejúzi qazaq halqyn syılaıdy, qazaqtyń qonaqjaılylyǵyna basyn ıedi»,- dedi Berdibek Saparbaev.

Búgin Aqtóbeniń mádenı, áleýmettik is-sharasyna belsene aralasyp, ekonomıkasynyń damýyna úles qosqan etnomádenı birlestik ókilderi marapattaldy. Sonymen qatar, Aqtóbe sahnasynda Reseıdiń Orynbor qalasy men Tatarstannan kelgen ónerpazdar kontsert qoıdy.