Ata-babamyzdyń quqyqtyq muralaryn muqııat zerdelep, jan-jaqty nasıhattaýymyz kerek – Prezıdent

ASTANA. KAZINFORM –  Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde ádiletti ári qaýipsiz Qazaqstandy qurý úshin zań men tártip ústemdigin túbegeıli ornyqtyrý kerek ekenin aıtty. Bul týraly Aqordanyń baspasóz qyzmeti habarlady.

- Ádiletti ári qaýipsiz Qazaqstandy qurý úshin zań men tártip ústemdigin túbegeıli ornyqtyrý kerek. Bul – barsha azamattyń múddesin, quqyǵy men bostandyǵyn qorǵaýdyń myzǵymas tiregi. Qoǵamnyń quqyqtyq mádenıetin arttyryp, quqyq qorǵaý júıesin jetildirý qajet. Bul – aýqymy keń mańyzdy mindet, - dedi Memleket basshysy.

Prezıdent qazaq halqy qaı zamanda da zańǵa bas ıgen, dala zańyn saqtaǵan halyq ekenin atap ótip, jumystyń negizgi basymdyqtaryna toqtaldy.

- Endi osy jumystyń negizgi basymdyqtaryna toqtalaıyn. Birinshiden. Biz «Zań jáne tártip» qaǵıdatyn jappaı dáripteýimiz kerek. Qazaq halqy qaı zamanda da zańǵa bas ıgen, dala zańyn saqtaǵan halyq. Bul – bizdiń qanymyzǵa sińgen qasıet. Túrik qaǵanaty, Altyn Orda men Qazaq handyǵy myqty memlekettik qurylymy, biregeı quqyqtyq júıesi bar qýatty el bolǵany bárimizge aıan. Qasym hannyń qasqa jolyn, Esim hannyń eski jolyn, Áz Táýkeniń Jeti jarǵysyn Uly dalanyń konstıtýtsııasy deýge bolady. Atadan balaǵa jalǵasqan bul zańdar memlekettilik dástúrin nyǵaıta otyryp, qoǵamdyq damýǵa erekshe yqpal etken. Uly dalada erkindik pen ádildik, ar-namys pen adamgershilik, tileýlestik pen jaýapkershilik bárinen bıik turǵan. Sondyqtan «Zań jáne tártip» qaǵıdaty ultymyzdyń rýhy men dúnıetanymyna tolyq saı keledi. Biz ata-babamyzdyń biregeı quqyqtyq muralaryn muqııat zerdelep, jan-jaqty nasıhattaýymyz kerek. Bul – halqymyzdyń quqyqtyq sana-sezimin arttyratyn mańyzdy faktordyń biri, - dedi Prezıdent.

Aıta keteıik, Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde sybaılas jemqorlyqpen kúres máselesin qozǵady.