Ata-babalarymyz myńjyldyqtar boıy musylman bolǵanyn jáne ǵulamalarymyz búkil álemge ustazdyq etkenin dáleldeýimiz kerek - M. Alsabekov
ALMATY. 5 sáýir. QazAqparat - Ata-babalarymyz búkil myńjyldyqtar boıy musylman bolǵanyn jáne elimizden shyqqan ǵulamalardyń búkil álemge ustazdyq etkenin dúnıejúzine dáleldeýimiz kerek.
Bul pikirin búgin Almatyda ótken «Myrza Muhammad Haıdar Dýlat parsy derekkózderinde» jáne «Hıbatýlla at-Tarazı jáne onyń rýhanı murasy» atty kitaptardyń tusaýkeserinde Qazaqstan musylmandary dinı basqarmasy tóraǵasynyń orynbasary sheıh Muhammed-Hýseın Alsabekov aıtty.
Onyń aıtýynsha, ártúrli dinı aǵymdar men sektalardyń kóbeıip, el ishin árki-tárki etýine jol berip alǵan ózimiz. Ol búkil myńjyldyqtar boıy ata-babalarmyzdyń musylman bolǵanyn jáne búkil álemge ustazdyq etken ǵulamary bar eldiń, urpaqtyń asyl synyǵy ekenimizdi dáleldeı almaýdyń saldary. Ǵulamalarymyzdyń qoljazbalary men kitaptaryn izdep taýyp, elge tanystyrýda kózge túsip júrgen zertteýshiler asa kóp emes.
«Keńestik dáýirde memlekettik qyzmette júrip namaz oqysańyz, ne din týraly aıtsańyz 10 jylǵa sottalyp ketýińiz múmkin edi. Máselen bir jýrnalıst óz maqalasynda haziret Áliniń qylyshyn jazǵany úshin ǵana osyndaı jazaǵa tartylǵan. Sondyqtan musylman ǵulamalaryn zertteý jumysyn sonaý keńestik dáýirden bastap júrgizip kele jatqan Ábsattar qajy Derbisáliniń eńbegin erek atap ótý kerek. Bul kitaptar osy úlken istegi súbeli eńbek deýge bolady», - deıdi «Hıbatýlla at-Tarazı jáne onyń rýhanı murasy» kitabynyń jaýapty redaktory Muhammed-Hýseın Alsabekov.
